Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 572 Hüküm no: 599 Orijinal metin no: [89a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Merhum Mustafa Ağa’nın küçük çocukları Mehmed Çelebi ve Ahmed Çelebi üzerine Koçak Mehmed Ağa’nın vasi, Piri Efendi’nin de vasi üzerine nazır tayin olunduğu Mahmiye-i Edirne’de vâki‘ olmuşdur. Mahmiye-i İstanbul’da Süleymaniye Câmi‘-i şerîfi kurbünde sâkin olup Dergâh-ı âlî müteferrikalarından olmakla rikâb-ı hümâyûn-ı sa‘âdet-makrûn ile mahmiye-i Edirne’ye dâhil oldukda vefât eden Mustafa Ağa b. ( ) verâseti zevce-i menkûhası Ümmühani bt. ( ) nâm hâtuna ve sulbî kebîr oğlu Mehmed Çelebi’ye ve sulbî sagīr oğlu Ali Çelebi’ye münhasıra olduğu şer‘an mütehakkık olup lâkin veresesi merkūmûn mahmiye-i İstanbul’da bulunup vefâtında hâzır bulundukları ecilden müteveffâ-yı mezbûrun yanında mevcûd bulunan terekesinden bey‘i sagīr-i mezbûra enfa‘ olan eşyâsını bey‘a ve kabz-ı semene ve bey‘ olunmayıp aynı ile verese-i merkūmûna îsâl ve teslîmi enfa‘ olan eşyâsını ba‘de’l-kabz verese-i mezkûruna îsâle bir vasî lâzım ve mühim olmakla müteveffâ-yı mezbûrun mahallesinden olup zümre-i sipâhîden olan sâhibü hâze’l-kitâb Koçak Mehmed Ağa b. ( ) her vechile emîn ve müstakīm olduğu sikāt ihbârıyla mütehakkık ve müte‘ayyin olmağın hâkim-i muvakkı‘-ı sadr-ı kitâb tûbâ lehü ve hüsnü-meâb hazretleri dahi merkūm Koçak Mehmed Ağa’yı vech-i meşrûh üzere vasî nasb ü ta‘yîn buyurup tereke-i müteveffâ-yı mezbûrdan bey‘i sagīr-i mezbûra nâfi‘ olan eşyâyı bey‘a ve kabz-ı semene ve bey‘ olunmayıp aynı ile verese-i merkūmûna îsâli enfa‘ olan eşyâyı kabz ve verese-i mezbûrûna îsâl ve teslîme ve bi’l-iktizâ lâzım gelen düyûn-ı müteferrika-i cüz’iyyesini sümün-i tereke-i müteveffâ-yı mezbûrdan edâya ve sâir cüz’î ve küllî umûrunu itmâma vasî nasb ü ta‘yîn buyurduklarında ol dahi vesâyet-i mezbûreyi kabûl ve hizmet-i lâzımesini edâya müte‘ahhid oldukdan sonra sâbıkā Büyük Rûznâme’de başhalîfe olan umdetü erbâbi’t-tahrîr ve’l-kalem Pîrî Efendi’yi dahi merkūm Koçak Mehmed Ağa üzerine husûs-ı mezbûrda hasbî nazır nasb ü ta‘yîn buyurduklarında ol dahi nezâret-i merkūmeyi kabûl ve hizmet-i lâzımesin edâya müte‘ahhid olmağın mâ-hüve’l-vâki‘ bi’t-taleb ketb olundu. Fî evâhiri Muharremi’l-harâm li-sene semân ve sittîn ve elf. Şühûdü’l-hâl: Mefharü’l-emâcid ve’l-ekârim Uzun Ali Ağa kethüdâ-yı merhûm Rûznameci İbrahim Efendi, Ebûbekir Ağa el-müteferrika, Mehmed Çelebi el-müteferrika, Abdulbâki Çelebi b. Mustafa Ağa el-müteferrika, İbrahim Bey b. ( ) tâbi‘-i Ali Kethüdâ, İbrahim Bey b. Ömer, el-Hâc Hüseyin Bey, Mahmud Çavuş b. ( ) ve gayruhüm mine’l-hâzırîn.