Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 575 Hüküm no: 601 Orijinal metin no: [90a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdülaziz Çelebi b. Fazlullah’ın Paşadivan köyündeki mülk değirmenini Mustafa Ağa b. Şaban’a yetmiş beş guruşa sattığı Vilâyet-i Anadolu’da Bolu sancağında Eflani kazâsında Taraklıborlu nâhiyesinde Afşar nâm karyede sâkin Abdülaziz Çelebi b. Fazlullah Efendi mahmiye-i Edirne’de meclis-i şer‘-i hatîrde hâlâ sadr-ı a‘zam müdebbir-i efham hazretlerinin kapıcıları kethüdâsı olan umdetü’l-emâsil ve’l-a‘yân sâhibü hâze’l-kitâb Mustafa Ağa b. Şa‘ban tarafından ikrâr-ı âti’l-beyânı tasdîka vekîli olup vekâleti bi-mâ-hüve nehcü’s-sübût şer‘an sâbite olan Mustafa Bey b. Hüseyin mahzarında tav‘an ikrâr ve i‘tirâf edip zikri âtî akdin sudûruna değin silk-i mülk-i sahîhimde münselik olup kazâ-i mezbûra tâbi‘ Paşadivanı nâm karye toprağında Paşayaylağı nâm mevzi‘de vâki‘ Paşasuyu demekle ma‘rûf nehr-i cârî üzerinde olup Yeni Değirmen demekle şehîr olmakla tahdîd ve tavsîfden müstağnî mülk değirmen yerimi kâffe-i hukūkuyla müvekkil-i mezbûra yetmiş beş riyâlî guruşa tarafeynden îcâb ve kabûlü hâvî bey‘ ile bâtten bey‘ edip ol dahi iştirâ ve kabûl ve semen-i merkūmu tamâmen bana teslîm edip ba‘de’l-kabz değirmen-i mezbûru mahallinde zabta mezbûru tarafımdan taslît eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu Fi’l-yevmi’l-ışrîn min-Saferi’l-hayr li-sene semân ve sittîn ve elf. Şühûdü’l-hâl: Memi Çavuş b. Mahmud ez-za‘îm, İbrahim Bey b. el-Hâc Hasan, Mustafa Bey b. Yusuf, İbrahim Bey b. Murtaza Çavuş, Osman Beşe b. Arslan, İbrahim Bey b. Mehmed, Resûl Bey b. Hüseyin, İbrahim Bey b. el-Hâc Satı, İbrahim Bey b. Hamid Dede, Mehmed Bey b. Mustafa ve gayruhüm.