Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 575 Hüküm no: 602 Orijinal metin no: [90a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Siyami Bey b. Mustafa’nın Burgos kazasına bağlı Oklağılı köyündeki bazı emlak ve eşya ve hayvanlarını kızı Bâkiye’ye hibe edip tarlalarının da kullanım hakkını devrettiği Vilâyet-i Rumeli’nde vâki‘ Burgos kazâsına tâbi‘ Oklağılı nâm karye sükkânından Siyami Bey b. Mustafa nâm kimesne mahmiye-i Edirne’de meclis-i şer‘-i hatîrde sulbiye kebîre kızı sâhibetü hâze’l-kitâb Bâkiye nâm hâtun tarafından ikrâr-ı âti’l-beyânı tasdîka vekîl olup vekâleti şer‘an sâbite olan zevci İsmail Bey b. ( ) nâm cündi mahzarında ikrâr ve i‘tirâf edip zikri âtî hibenin sudûruna değin silk-i mülk-i sahîhimde münselik olup karye-i mezbûrede vâki‘ bir tarafdan yine kendi mülküme ve bir tarafı Halil nâm kimesne mülküne ve bir tarafdan bazen Şükrullah ve bazen Abdülkerim ve bazen Salih nâm kimesneler müklerine ve bir tarafdan tarîk-ı âmma müntehî olup iki tahtânî odayı ve bir sofayı ve bir çatma ahırı müştemil olan cemî‘ mülk menzilimi kâffe-i hukūkuyla ve yine karye-i mezbûrede vâki‘ bir tarafdan Hüseyin Beşe harmanına ve bir tarafdan harmanlara ve bir tarafdan Halil nâm kimesne mülküne ve bir tarafdan tarîk-ı âmma müntehî ve nısfı kerpiçden ve nısf-ı âharı çatmadan mebnî olan bir ahırımı ve bir çatma anbarımı kâffe-i hukūkuyla ve iki döşeğimi ve iki yorganımı ve altı tâne sahânımı ve altı tâne kilimimi ve iki kazganımı ve altı tâne tenceremi ve altı tâne sagīr sahanlarımı ve dört tâne bakracımı ve iki tâne tasımı ve bir leğen ve bir ibiği ve iki tâbemi ve sagīr ve kebîr iki tepsimi ve iki tâne ayaklı sandığımı ve sekiz tâne yasdığımı ve iki çarşebimi ve levn ve nev‘i beynimizde ilm-i şer‘î ile ma‘lûm on re’s öküzlerimi ve beş re’s ineklerimi ve beş re’s danamı ve beş re’s susığırı ineklerimi ve bir çift öküzümü ve üç re’s susığırı danalarımı ve beş re’s ineklerimi ve beş re’s danamı ve beş re’s susığırı ineklerimi ve bir çift öküzümü ve üç re’s susığırı danalarımı kızım müvekkile-i merkūme Bâkiye Hâtun’a ba‘de’t-tahliyeti’ş-şer‘iyye hibe ve temlîk ve teslîm edip ol dahi ittihâz ve kabûl ve tesellüm ettiğinden mâ‘adâ zikri âtî ferâğ ve tefvîzin sudûruna değin ma‘rifet-i sâhib-i arzla taht-ı yedimde ve tasarrufumda olup karye-i mezbûre sınırında vâki‘ ve âhar karye sınırında vâki‘ hudûdu ve mevâzi‘i beynimizde ma‘lûm cemî‘ tarlalarımın hakk-ı karâr ve tasarruflarını dahi kâffe-i hukūkuyla ma‘rifet-i sâhib-i arzla kızım müvekkile-i merkūme Bâkiye Hâtun’a iki bin akçe mukābilesinde ferâğ ve tefvîz ve tesellüm edip ol dahi tefevvüz ve kabûl ve tesellüm ettikden sonra bedel-i mezkûru yedinden tamâmen ahz u kabz eyledim min ba‘d zikrolunan menzil ve samanlık ve anbar ve sâir menkūlât kızım müvekkile-i mezbûrenin mülk-i mevhûbudur ve zikrolunan tarlalar dahi hakk-ı müfevvazıdır keyfemâ teşâ mutasarrıfe olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’l-hâmis ve’l-ışrîn min-Saferi’l-hayr li-sene semân ve sittîn ve elf. Şühûdü’l-hâl: İshak Ağa b. Bahtiyar, Ahmed Halîfe b. İslam, Ali Bey b. ( ) el-cündi, es-Seyyid Ömer Çelebi b. ( ), Hüseyin Çelebi b. ( ), Mustafa b. Ramazan, Ahmed Çelebi b. Himmet, Keyvanzâde Mustafa, Ahmed el-muhzır.