Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 576 Hüküm no: 603 Orijinal metin no: [90b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Delvine Sancağı Mutasarrıfı Ali Paşa’nın Hüseyin Çavuş b. Halil’e beş buçuk kese akçe alacağı olduğunu ikrar ettiği Hâlâ Bosna Eyaleti ser-haddinde olan kılâ‘-ı İslâmiyyeden Nova Kal‘ası’nda nevbetci olan Dergâh-ı âlî yeniçerileri taraflarından bin altmış yedi senesinde tâife-i mezbûreye ta‘yîn olunan zahîre-bahâlarına ta‘yîn olunan mevâzi‘den ahz u kabza ve kendilere îsâle me’mûr ve vekîl olan kırk beşinci ağa bölüğünün çavuşu olan Hüseyin Çavuş b. Halil mahmiye-i Edirne’de meclis-i şer‘de hâlâ ber-vech-i arpalık Delvine sancağına mutasarrıf olan umdetü’l-ümerâ’i’l-kirâm zübdetü küberâ’i’l-fihâm Ali Paşa mahzarında bi’l-vekâle tav‘an ikrâr ve i‘tirâf edip kal‘a-i mezbûrede nevbetci olan tâife-i mezbûrenin sene-i mezbûrede ta‘yîn olunan zahîre-bahâları olan dokuz buçuk kîse akçe bundan akdem sebeb-i tahrîr emriyle vilâyet-i mezbûrenin nüzül ve avârızı malından havâle olunup yedlerine sebeb-i tahrîr verilmişdi lâkin meblağ-ı mezbûrun vilâyet-i mezbûre malından tahsîli sonra olmadığı ecilden meblağ-ı mezbûr mîrîden kalmağla mürâca‘at olundukda edâ tezkiresi ile zikrolunan dokuz buçuk kîse paşa-yı mûmâ-ileyhin taht-ı iltizâmında olan Bastiye nâm-ı diğer Sabanada mukāta‘ası malından edâ ile dîvân tezkiresi verilmişidi hâlâ havâle olunan dokuz buçuk kîseden dört kîsede de kîsesi kırk bin akçe olmak üzere yüz altmış bin râyic [fi’l]-vakt akçeyi paşa-yı müşârun-ileyh mâl-ı mukāta‘a-i mezbûreden bana def‘ ve teslîm edip ben dahi bi’l-vekâle ahz u kabz edip meblağ-ı bâkī beş buçuk kîse ki hesâb-ı mezkûr üzere iki yük yirmi bin akçeyi târih-i kitâbdan kırk gün tamâmında Delvine kasabasında tamâmen bana def‘ ve teslîmi ta‘ahhüd etmekle ben dahi kabûl ve dîvân tezkiresini paşa-yı mûmâ-ileyhe def‘ ve teslîm eyledim dedikde mukırr-ı mezbûru ikrâr-ı meşrûhunda paşa-yı mûmâ-ileyh bi’l-müvâcehe tasdîk edip meblağ-ı bâkī iki yük yirmi bin akçeyi kasaba-i mezbûrede edâya ta‘ahhüd ve dîvân tezkiresini ahzını tav‘an ikrâr edicek mâ-vaka‘a bi’t-taleb ketb olundu. Fi’l-yevmi’s-sâlis min şehri Rebî‘i’l-evvel li-sene semân ve sittîn ve elf. Şühûdü’l-hâl: Umdetü’l-emâcid Süleyman Ağa zağarcıbaşı hâlâ, Yusuf Efendi ser-kassâbân, Hasan Çelebi b. ( ) birader-i Yusuf Efendi, Ömer Kethüdâ b. Abdullah, Mehmed Çelebi el-yesârî, Mehmed Beşe 63. cemâ‘at.