Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 387 Hüküm no: 365 Orijinal metin no: [80b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ferruh Kethuda vakfından günlük yirmi beş akçe ücretini 30 aydan beri alamayan Derviş Mehmed b. Ahmed’e bu ücretin vakfın mütevelliyesi Ayşe bt. Mehmed tarafından ödenmesi Mahmiye-i İstanbul’da Balat kapısı kurbünde vâki‘ merhûm Ferruh Kethudâ nâm sahibü’l-hayrın evlâdından işbu bâ‘isü’l-kitâb Derviş Mehmed b. Ahmed meclis-i şer‘-i hatîrde vâkıf-ı mezbûrun evlâdiyet ve meşrûtiyet üzre vakfına mütevelliye olan Âişe bt. Mehmed nâm hatun mahzarında üzerine da‘vâ ve takrîr-i kelâm edip merhûm-ı mezbûr vakfının zevâid-i gallesinden evlâdının sinnen ekberine beher yevm yirmi beşer akçe vazîfe verilmek üzre şart ve ta‘yîn ve vakfiye-i ma‘mûlün-bihâ ve mu‘avvelün-aleyhâ tasrîh ve tebyîn etmeğin merhûm-ı mezbûrun ekber-i evlâdı Mehmed târih-i kitâbdan otuz ay mukaddem vefât edip benden gayrı sinnen kebîri olmamağla ber-mûceb-i şart-ı vâkıf yirmi beş akçe vazîfeye ben mutasarrıf olmağın hâlâ mütevelliye-i mezbûre ile muhâsebe görüp târih-i kitâba gelince otuz aylık vazîfemden ba‘de-külli’l-hesâb on dört bin akçem mütevelliye-i mezbûrenin makbûzu olup kendi mesârifine sarfla istihlâk etmekle suâl olunup alıverilmesi matlûbumdur dedikde gıbbe’s-suâl mütevelliye-i mezbûre cevâbında fi’l-hakīka hâl bâlâda tafsîl olunan minvâl üzre olup mezbûr Derviş Mehmed vâkıf-ı mezbûrun hâlâ sinnen ekber-i evlâdı olmağla otuz aydan beri ber-mûceb-i şart-ı vâkıf mutasarrıf olduğu yevmî yirmi beşer akçe vazîfesinden târih-i kitâba gelince muhâsebemiz görülüp mezbûrun on dört bin akçe vazîfesini ben galle-i vakıfdan kabz ve mesârifine [mesârifime] sarfla istihlâk etmeğin hâlâ <> deyü ikrâr ve i‘tirâf etmeğin alâ-mûceb-i i‘tirâfihî meblağ-ı mezbûr on dört bin akçeyi mezbûr Derviş Mehmed’e edâ ve teslîme mütevelliye-i mezbûreye tenbîh olunup mâ-hüve’l-vâki‘ bi’t-taleb ketb olundu. Fi’l-yevm fî-evâili Rebî‘i’l-âhir li-sene ihdâ ve tis‘în ve elf. Şuhûdü’l-hâl: Mustafa Efendi el-kâtib, Mehmed Çelebi b. Haydar, Mehmed Çelebi b. Mustafa, Ali Çelebi b. el-Hâc, İsmail Çelebi b. Murad el-Hâc. (...) kaldığı vakıfda (...) (...) müte‘ayyin olup yedi nefer i‘tirâf eylemişdir. Mehmed Müstakīm Bende-i Rüstem