Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 388 Hüküm no: 366 Orijinal metin no: [80b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yani v. Dimitri’nin sahip olduğu su değirmenini Yani v. Yorgi’ye sattığı Vilâyet-i Rumeli’nde Yenişehir kazâsı nevâhîsinden Kûhistân nâhiyesine tâbi‘ Kirasova nâm karyeden olup hâlâ mahrûse-i Galata’da Azapkapısı kurbünde müsâferet vechi üzre sâkin olan Yani v. Dimitri nâm zimmî meclis-i şer‘-i hatîr-i lâzımü’t-tevkīrde işbu bâ‘isü’r-rakīm diğer Yani v. Yorgi nâm zimmî muvâcehesinde bi’t-tav‘i’s-sâf ikrâr ve takrîr-i kelâm edip akd-i âti’z-zikrin sudûruna değin yedimde mülküm olup karye-i mezbûrede vâki‘ bir tarafdan Selviova Değirmeni ve bir tarafdan cebel ve bir tarafdan dere ve bir tarafdan tarîk-ı âm ile mahdûd bir göz mülk su değirmenimi bi-cümleti’t-tevâbi‘ [ve’l-levâhık] ve kâffetü’l-hukūk ve’l-merâfık tarafeynden îcâb ve kabûlü hâvî bey‘-ı kat‘î ile mezbûr Yani’ye altı bin akçeye <> bey‘-ı bâtt-ı sahîha-i şer‘iye ile bey‘ ve teslîm ol dahi yedimden iştirâ ve tesellüm ve kabûl eylediğinden sonra semeni olan meblağ-ı mezbûr altı bin akçeyi müşteri-i mezbûr Yani yedinden bi’t-tamam ve’l-kemâl ahz ü kabz edip mârrü’z-zikr değirmeni mahâllinde kabz ve tasarrufa taslît eyledim ba‘de’l-yevm mülk-i müşterâsıdır keyfe mâ yeşâ’ ve yahtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’r-râbi‘ aşer min-şehri Rebî‘i’l-âhir li-sene ihdâ ve tis‘în ve elf. Şuhûdü’l-hâl: Abdi Yazıcı, Kenan Pazarcı, Mehmed Çelebi b. Haydar, Ahmed Çelebi b. Piyale, Ahmed Çelebi b. el-Muhzır, Abdullah Çelebi b. Abdullah.