Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 388 Hüküm no: 367 Orijinal metin no: [80b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hakime bt. Mehmed’in, Gülferah bt. Abdullah’ın sol kolunu sopa ile vurup kırdığının ispat edildiği Mahrûse-i Galata’ya tâbi‘ Beşiktaş’da Sinan Paşa Mahallesi’nde sâkine işbu bâ‘isetü’l-kitâb Gülferah bt. Abdullah nâm hatun meclis-i şer‘de yine mahalle-i mezbûrede sâkine Hâkime bt. Mehmed mahzarında üzerine da‘vâ ve takrîr-i kelâm edip mezbûre Hâkime târih-i kitâbdan altı gün mukaddem bir asâ ile sol kolumun bâzûsuna urup andan nâşî bileğim kemiği yarılıp beni meksûre etmişdir suâl olunup mûcebi icrâ olunmak matlûbumdur dedikde evvelâ mezbûre Gülferah’ın kolu bu makūle uyûbu teşhîse kādir cerrâhlardan İbrahim Efendi b. Abdullah ve Abdullah Efendi b. Mustafa nâm kimesnelere irâet olundukda onlar dahi ba‘de’n-nazar fi’l-hakīka müdde‘iyye-i mezbûrenin sol kolunun bileği kemiği darbdan nâşî çatlayıp meksûre olduğunu her biri haber vermeğin gıbbe’s-suâl ve akībe’l-inkâr müdde‘iyye-i mezbûreden müdde‘âsına beyyine taleb olundukda zât-ı mezbûreyi ma‘rifet-i şer‘iye ile ârifân yine mahalle-i mezbûre ahâlîsinden Ali b. Abdullah ve yine mahalle-i mezbûrede sâkine Havva bt. Mahmud ve Fâtıma bt. Ali nâm hatunlar meclis-i şer‘a hâzırûn olup isre’l-istişhâd fi’l-vâki‘ işbu mezbûre Hâkime târih-i mezbûrda bir asâ ile müdde‘iyye-i mezbûre Gülferah’ın sol kolunun bâzûsuna urup mezbûreyi meksûre eyledi biz bu husûsa bu vech üzre şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde [şühûd-ı] mezbûreyi ta‘dîl ve tezkiye için cânib-i şer‘den irsâl olunan Mustafa Efendi b. Derviş Mehmed Efendi mahalle-i mezbûreye varıp ahâlîsinden İmâm Ahmed Efendi b. Hamza ve Mehmed Efendi b. Receb ve Müezzin Ali Çelebi b. Cafer ve Süleyman b. Ahmed ve Mehmed b. Mustafa [ve] Mehmed b. Abdullah ve Mustafa b. Durmuş ve Mehmed Çelebi b. Abdullah ve İbrahim b. Mahmud nâm kimesnelerden şühûd-ı mezbûrenin keyfiyet-i hâllerini istikşâf etdikde mezbûrûndan her biri adl ve makbûlü’ş-şehâde olduklarını haber vermeğin vâki‘ hâli mezbûr Mustafa Efendi mahâllinde ketb ve terkīm edip ba‘dehû ma‘an irsâl olunan Mehmed b. Ahmed [ile] meclis-i şer‘a (...) [gelip] alâ-vukū‘ihî inhâ ve takrîr etmeğin emr-i ta‘dîl ve tezkiye tamam ve şehâdetleri makbûle olmağın mûcebiyle [ba‘de’l-hükm] mâ-hüve’l-vâki‘ [81a] bi’t-taleb ketb olundu. Fi’l-yevmi’s-sâlis aşer min-Rebî‘i’l-âhir li-sene ihdâ ve tis‘în ve elf. Şuhûdü’l-hâl: Mehmed Beşe b. Musa, Mehmed Çelebi b. Haydar, el-Hâc Abdullah b. Ahmed, Mustafa b. Veli, Mustafa b. Durmuş.