Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 389 Hüküm no: 368 Orijinal metin no: [81a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şerife Fâtıma Hatun’un evini Mehmed Efendi b. Bali’ye sattığı Mahmiye-i İstanbul’da Küçük Karaman kurbünde Mi‘mâr Sinan Mahallesi’nde sâkin iken bundan akdem vefât eden Yav[uz]zâde demekle şehîr es-Seyyid Mustafa Efendi b. es-Seyyid Mehmed Efendi’nin verâseti sulbî sagīr oğulları es-Seyyid Mehmed ve es-Seyyid Ahmed ve es-Seyyid Hasan’a münhasıra olup ba‘dehû sagīr-i mezbûr es-Seyyid Mehmed vefât edip verâseti karındaşları sagīrân-ı mezbûrân es-Seyyid Ahmed ile es-Seyyid Hasan’a münhasıra olup ba‘dehû sagīr-i mezbûr es-Seyyid Ahmed dahi vefât edip verâseti karındaşı sagīr-i mezbûr es-Seyyid Hasan’a münhasıra olup ba‘dehû sagīr-i mezbûr es-Seyyid Hasan dahi vefât edip verâseti babası Yavuzzâ[de] es-Seyyid Mustafa Efendi’nin li-ebeveyn karındaşı oğlu es-Seyyid Hasan Efendi b. es-Seyyid Ahmed Efendi’ye münhasıra olup ba‘dehû mezbûr es-Seyyid Hasan Efendi dahi vefât edip verâseti ancak li-ebeveyn kız karındaşı Şerife Fâtıma Hatun’a münhasıra olduğu şer‘an zâhir ve müte‘ayyin oldukdan sonra zât-ı mezbûreyi ma‘rifet-i şer‘iye ile ârifûn olan Seydi Yusuf Beşe b. Abdullah ve Mehmed Çelebi b. İlyas ve Himmet b. Mustafa ve Mustafa Efendi b. el-Hâc Abdi ve eş-Şeyh Mehmed b. İsmail nâm kimesneler ta‘rîfleriyle mu‘arrefe oldukdan sonra mezbûre Şerife Hatun bt. es-Seyyid Ahmed Efendi meclis-i şer‘-i şerîfde işbu râfi‘u’l-kitâb Mehmed Efendi b. Bali nâm kimesne mahzarında ikrâr ve takrîr-i kelâm edip ber-vech-i muharrer müteveffâ-yı mezbûr es-Seyyid Mustafa Efendi’nin terekesinden bi-hasebi’l-irsi’ş-şer‘î bana isâbet ve intikāl edip akd-i âti’z-zikrin sudûruna değin silk-i mülkümde münselik olup mahalle-i mezbûrede vâki‘ bir tarafdan Abdurrahman Efendi vakfı olan odalar ve ba‘zan Paşa odaları ve bir tarafdan sandığı Mehmed Çelebi tasarrufunda olan vakıf menzil ve ba‘zan İhsan Hatun tasarrufunda olan menzil ve bir tarafdan Kara Emin vakfı olan odalar ve ba‘zan Berber Mehmed Çelebi tasarrufunda olan vakıf menzil ve bir tarafdan tarîk-ı âm ile mahdûd hâriciyesinde tahtânî iki bâb oda ve fevkānî dört bâb oda ve bir cihânnümâ ve bir sofa ve bir cüneyne ve bir kenîf ve dâhiliyesinde tahtânî bir bâb oda ve bir kiler ve bir su kuyusunu müştemil bir matbah ve fevkānî dört bâb oda ve iki sofa ve üç kenîf ve tarîk-ı âmma nâzır sekiz bâb dükkân kileriyle bir bakkāl dükkânını müştemil mülk menzilimi arsa-i memlûkeleriyle bi-cümleti’t-tevâbi‘ ve’l-levâhık ve kâffetü’l-menâfi‘ ve’l-merâfık mezbûr Mehmed Efendi’ye tarafeynden îcâb ve kabûlü hâvî bey‘-ı bâtt-ı sahîh-i şer‘î ile dört bin beş yüz esedî guruşa bey‘ ve teslîm ve temlîk ol dahi ber-vech-i muharrer iştirâ ve kabûl ve tesellüm ve temellük eyledikden sonra semeni mezbûr dört bin beş yüz esedî guruşu mezbûr Mehmed Efendi’nin hâlâ iktidârı olmamağla târih-i kitâbdan bin beş yüz guruşunu yirmi beş gün ve üç bin guruşunu üç yüz altmış gün tamamına değin tecîl eylediğimde ol dahi tecîl-i mezbûru kabûl eyledi dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’l-hâmis min-şehri Rebî‘i’l-âhir li-sene ihdâ ve tis‘în ve elf. Şuhûdü’l-hâl: el-Hâc Mustafa b. Ömer, el-Hâc Mehmed Ağa b. Odabaşı, Uzun Mehmed b. ( ), Derviş Musa Beşe b. ( ), Mehmed Çelebi b. Haydar, Ahmed Çelebi b. Piyale.