Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 390 Hüküm no: 369 Orijinal metin no: [81a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Gülistan bt. Süleyman’ın evini Mustafa Beşe b. Veli’ye sattığı Mahrûse-i Galata a‘mâlinden kasaba-i Fındıklı’da Selime Hatun Mahallesi’nde sâkine Gülistan bt. Süleyman nâm hatun tarafından husûs-ı âti’z-zikre vekîl olduğu zât-ı mezbûreyi ma‘rifet-i şer‘iye ile ârifân Mahmud Çelebi b. İbrahim ve Osman Çelebi b. el-Hâc Şa‘ban nâm kimesneler şehâdetleriyle şer‘an sâbit ve zâhir olan el-Hâc İbrahim b. el-Hâc Ahmed nâm kimesne meclis-i şer‘-i şerîf-i lâzımü’t-teşrîfde işbu râfi‘u’l-kitâb Mustafa Beşe b. Veli nâm kimesne mahzarında ikrâr ve takrîr-i kelâm edip müvekkilem mezbûre Gülistan’ın akd-i âti’z-zikrin sudûruna değin silk-i mülkünde münselik olup mahalle-i mezbûrede vâki‘ bir tarafdan el-Hâc Nasuh mülkü ve bir tarafdan Saime Hatun mülkü ve bir tarafdan Mestçi Süleyman Çelebi mülkü ve bir tarafdan tarîk-ı âm ile mahdûd tabaka-i ulyâda bir bâb oda ve tabaka-i vustâda bir bâb oda ve bir sofa ve bir tahta-pûş ve tabaka-i süflâda bir bâb oda ve bir su kuyusu ve kenîfi müştemil mülk menzilini bi-cümleti’t-tevâbi‘ ve’l-levâhık mezbûr Mustafa Beşe’ye tarafeynden îcâb ve kabûlü hâvî bey‘-ı kat‘î ile iki yüz elli esedî guruşa bi’l-vekâle bey‘ ve teslîm ve temlîk ol dahi ber-vech-i muharrer iştirâ ve kabûl ve tesellüm ve temellük etdiğinden sonra semeni olan meblağ-ı mezbûr iki yüz elli esedî guruşu mezbûr Mustafa Beşe yedinden bi’l-vekâle tamamen ahz ü kabz eyledim ba‘de’l-yevm menzil-i mahdûd-ı mezkûr mezbûr Mustafa Beşe’nin mülk-i müşterâsıdır keyfe mâ yeşâ’ ve yahtâr mutasarrıf olsun dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’s-sâlis aşer min-Rebî‘i’l-âhir li-sene ihdâ ve tis‘în ve elf. Şuhûdü’l-hâl: Mehmed Efendi b. Hüseyin, Mustafa Efendi b. el-imâm, Hasan Efendi b. Mustafa, İbrahim Efendi el-imâm bi-mahalle-i mezbûre, Süleyman Beşe, Abdullah Çelebi, Mehmed Çelebi b. Piyale, Ahmed Çelebi b. Haydar.