Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 391 Hüküm no: 370 Orijinal metin no: [81b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Fâtıma bt. Abdullah’ın anne ve babasının, kızlarının terekesinden kendilerine isabet eden hisselerini merhûmenin kocası Abdurrahman Efendi’den teslim aldıkları Husûs-ı âti’l-beyânın mahâllinde tahrîri iltimâs olunmağın savb-ı şer‘-i mergūbdan irsâl olunan Mevlânâ Hüseyin Efendi b. Himmet mahmiye-i İstanbul’da Hadîce Sultân Mahallesi’nde sâkin Abdurrahman Efendi b. Mehmed’in menziline varıp zeyl-i kitâbda muharrerü’l-esâmî olan Müslimîn huzûrlarında akd-i meclis-i şer‘-i mübîn eyledikde mahalle-i mezbûrede sâkine iken bundan akdem vefât eden Fâtıma bt. Abdullah Efendi nâm hatunun verâseti zevc-i metrûkü mezbûr Abdurrahman Efendi’ye ve sadrî oğlu Abdullah’a ve sadriye kızı Hadice’ye ve babası mezbûr Abdullah Efendi’ye ve anası Âişe bt. Murad’a münhasıra olup ba‘dehâ mezbûr Abdullah dahi vefât edip verâseti babası mezbûr Abdurrahman Efendi’ye ve anasının anası mezbûre Âişe’ye münhasıra olup ba‘dehû mezbûr[e] Hadîce vefât edip verâseti babası mezbûr Abdurrahman Efendi’ye ve anasının anası mezbûre Âişe’ye münhasıra ve tashîh-i mes’elesi bi-tarîkı’l-münâsahati’ş-şer‘iye yüz sekiz sehimden i‘tibâr olunup sihâm-ı mezbûreden altmış dört sehmi mezbûr Abdurrahman Efendi’ye ve yirmi altı sehmi mezbûre Âişe Hatun’a ve on sekiz sehmi mezbûr Abdullah Efendi’ye isâbet ve intikāl eylediği şer‘an sâbit ve zâhir oldukdan sonra mezbûrân Abdullah Efendi ve Âişe Hatun meclis-i ma‘kūd-ı mezbûrda müteveffât-ı mezbûre Fâtıma Hatun’un terekesine bi’l-verâse vâzı‘u’l-yed olan işbu bâ‘isü’l-kitâb mezbûr Abdurrahman Efendi mahzarında her biri ikrâr ve takrîr-i kelâm edip müteveffât-ı mezbûre Fâtıma Hatun’un mecmû‘-ı eşyâsı kıymeti olan yirmi bin akçe terekesinden bi-tarîkı’l-münâsahati’l-mezbûre bi’l-irsi’ş-şer‘î bize isâbet ve intikāl eden hisse-i şer‘iyemizi mezbûr Abdurrahman Efendi yedinden tamamen ahz ü kabz eylediğimizden sonra müteveffât-ı mezbûre Fâtıma Hatun’un kalîl ve kesîr ve celîl ve hakīr ma‘lûme ve mechûle terekesine müte‘allika âmme-i de‘âvî ve mutâlebât ve eymân ve muhâsamâtdan biz mezbûr Abdurrahman Efendi’nin zimmetini ibrâ ve ıskāt edip ol dahi ber-vech-i muharrer bizim zimmetimizi ibrâ ve ıskāt eyledi dediklerinde gıbbe’t-tasdîkı’ş-şer‘î husûs-ı mezbûru mevlânâ-yı mezbûr mahâllinde tahrîr ba‘dehû ma‘an irsâl olunan Mahmud Çelebi ile meclis-i şer‘a gelip alâ-vukū‘ihî inhâ ve takrîr etmeğin mâ-hüve’l-vâki‘ bi’t-taleb ketb olundu. Fi’l-yevmi’r-râbi‘ min-şehri Rebî‘i’l-âhir li-sene ihdâ ve tis‘în ve elf. Şuhûdü’l-hâl: Fahrü’l-akrân Mehmed Ağa b. Hızır, Meremmet Kâtibi Mehmed Efendi, Salih Efendi b. Receb, İsmail Çelebi b. ( ), Câbî Osman Çelebi b. ( ), Mehmed Ağa b. Hüseyin, Hasan Efendi b. Bayram el-imâm, el-Hâc Ali b. Ömer, Mustafa Çelebi b. Bâzergânzâde, Ahmed Çelebi b. Piyale.