Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 392 Hüküm no: 371 Orijinal metin no: [81b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Osman Beşe b. Ahmed’in ölen Manko v. Koro’daki alacağını, küçük çocuklarının vasîsi olan Marko’dan teslim aldığı Celeb-keşân tâifesinden Osman Beşe b. Ahmed nâm kimesne meclis-i şer‘-i şerîf-i enverde Havâss-ı Aliyye kazâsına tâbi‘ Küçükköy nâm karye sükkânından olup bundan akdem hâlik olan Manko v. Koro nâm zimmînin sulbî oğulları Yorgaki ve Hristaki nâm sagīrlerin kıbel-i şer‘den mansûb vasîleri olmağla terekesine vâzı‘u’l-yed olan işbu râfi‘u’l-kitâb Marko v. ( ) nâm zimmî muvâcehesinde ikrâr ve takrîr-i kelâm edip hâlik-i merkūm zimmetinde hayatında yedimden iştirâ ve makbûz yüz kırk aded koyun semeninden on dokuz bin altı yüz akçe hakkım olup kable’l-edâ hâlik olmağla mukaddemâ meblağ-ı mezbûru vasîyy-i mezbûrdan hâkim-i muvakki‘-i sadr-ı kitâb huzûrunda şühûd-ı udûl ile isbât edip meblağ-ı mezbûru tereke-i hâlik-i mezbûrdan bana teslîme vasîyy-i mezbûra tenbîh olunmuşidi hâlâ meblağ-ı mahkûmun-bih mezbûr on dokuz bin altı yüz akçeyi vasîyy-i mezbûr Marko yedinden bi’t-tamam ahz ü kabz eyledim yedinde bir akçe ve bir habbe bâkī kalmadı dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’l-âşir min-şehri Rebî‘i’l-âhir li-sene ihdâ ve tis‘în ve elf. Şuhûdü’l-hâl: Murad Beşe b. Mehmed, Mehmed Çelebi b. Haydar, Ahmed Çelebi b. Piyale, Abdullah Çelebi b. Ömer, Ömer Çelebi b. Abdullah.