Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 393 Hüküm no: 373 Orijinal metin no: [82a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Köylerindeki otlağa Şeyh Sinan Erdebilî zaviyesi şeyhinin tasarruf ettiğinden bahisle men edilmesi için dava açan Kemaller köyü ahalisinin davalarının reddedildiği Vilâyet-i Rumeli’nde Çorlu kazâsına tâbi‘ Kemâller nâm karye ahâlîsinden Mehmed b. Himmet ve Süleyman b. Ali ve Mehmed b. Veli ve Mehmed b. Hasan nâm kimesneler meclis-i şer‘-i şerîf-i enver ve mahfil-i dîn-i münîf-i ezherde mahmiye-i İstanbul’da Ayasofya-i Kebîr Câmi‘-i Şerîfi kurbünde vâki‘ Kutbü’l-ârifîn Şeyh Sinan Erdebilî zâdeye senede [zâviyesine] hâlâ şeyh olan bâ‘isü hâze’l-kitâb umdetü’s-sâlikîn Şeyh Mehmed Efendi b. el-merhûm Şeyh Ahmed mahzarında her biri takrîr ve da‘vâ edip karye-i mezbûrede vâki‘ etrâf-ı erba‘ası karye-i mezbûre mer‘âsıyla mahdûd ve mümtâz otlak mer‘âmız dâhilinde olup tasarrufuna biz müstahık iken merkūm Şeyh Mehmed Efendi mârrü’z-zikr otlağı her sene zabt ve tasarruf edip bizi müdâhale etdirmez suâl olunup men‘ olunması matlûbum[uz]dur dediklerinde gıbbe’s-suâl merkūm Şeyh Mehmed Efendi cevâbında Kemâller nâm karye feth-i hâkānîden beri zâviye-i mezkûrede sâkin fukarâ ve etrâf ve eknâfdan gelip tekye-i mezkûrede sâkin olan müsâfirîne hâsılı ta‘âmiye olmak üzre vakıf ve hâsıl olan <> a‘şâr-ı şer‘iye ve rüsûm-ı mukarrere ve resm-i kışlak ve bi’l-cümle ra‘iyyet-i vakfa hâsıl kaydolunmağla işbu yedimde olan sûret-i defter-i hâkānî ve emr-i şerîf-i âlî-şân mûcebince mârrü’z-zikr kışlağı zabt ve hâsılını vakıf için kabz ederim deyü tuğrâ-yı garrâ-yı sultânî ile muhallâ sûret-i defter-i hâkānî ve emr-i şerîf-i cihân-mutâ‘ ibrâz edip nazar olundukda fi’l-hakīka karye-i mezkûre hatt-ı hümâyûn-ı sa‘âdet-makrûnla zâviye-i mezbûre şeyhine zâviye-i mezbûrede sâkin fukarâ ve müsâfirîn ta‘âmiyeleri için vakf olup a‘şâr-ı şer‘iye ve resm-i bâgāt ve resm-i ağıl ve resm-i arûs ve tapu-yı zemîn ve bi’l-cümle rüsûm-ı mukarreresini vakfa hâsıl kaydolunduğu mukayyed ve mastûr ve emr-i şerîf-i âlî-şânda dahi karye-i mezbûre ahâlîsi cânib-i mîrîden arpa ve saman ve sancakbeyi teklîfi vâki‘ oldukda biz çekeriz ol mukābelede kışlak resmini biz alırız deyü nizâ‘ ederler ise kışlak nâmına defterde resm-i ağıl kaydolunmağla kışlak resminde re‘âyânın medhali yokdur kışlak resmi sahib-i arzındır deyü musarrah bulunup ve mezbûrûn karye-i mezkûre kadîmü’l-eyyâmdan bâlâda tafsîl olunan minvâl üzre zâviye-i mezkûrede şeyh olanlara hâsılı dârende ve müsâfirînin ta‘âmiyeleri için vakf olduğunu dahi her biri mu‘terif ve mezkûr Şeyh Mehmed Efendi’nin takrîr-i meşrûhunu tasdîk ve tahkīk etmeğin mûcebiyle mezbûrûn bî-vech mu‘ârazadan men‘ olunup işbu vesîka bi’t-taleb <> hıfzan li’l-makāl ketb olundu. Fî-evâili Rebî‘ülâhir sene [10]91. Şuhûdü’l-hâl: Mustafa Efendi b. Mehmed, Şeyh Mustafa Efendi b. eş-Şeyh Mehmed, Muharrem Efendi b. ( ), Mehmed Efendi b. ( ), Salih Çelebi b. ( ), Halil Dede, Abdülhayr [b.] Ahmed, Kara Mehmed Dede.