Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 394 Hüküm no: 374 Orijinal metin no: [82a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Ağa b. el-Hâc Ömer’e olan borcunu ödediğini iddia eden Maden b. Mehmed’e iddiasını ispatlaması için mehil verildiği Fi’l-asl Vilâyet-i Anadolu’da Menteşe Sancağı’nda Muğla kasabasında Hoca Ahmed Mahallesi ahâlîsinden olup mahmiye-i İstanbul’da Mihrimah Hatun Mahallesi’nde müsâferet vechi üzre sâkin hâlâ Menteşe alaybeğisi olan umdetü’l-eşbâh işbu râfi‘u’l-kitâb Mustafa Ağa b. el-Hâc Ömer nâm kimesne meclis-i şer‘de el-Hâc Ma‘den b. Mehmed mahzarında üzerine da‘vâ ve takrîr-i kelâm edip mezbûr el-Hâc Ma‘den zimmetinde cihet-i deyn-i şer‘îden iki yüz on dört buçuk guruş hakkım olup meblağ-ı mezbûrun elli guruşunu kendi yedinden ve on sekiz guruşunu etbâ‘ımdan gāib ani’l-meclis Ömer Ağa yediyle ahz ü kabz edip min-haysü’l-mecmû‘ altmış sekiz guruşunu istifâ eylediğimden sonra yüz kırk altı buçuk guruş hakkım bâkī kalmağla taleb eylediğimde bana edâdan imtinâ‘ eder suâl olunup alıverilmesi matlûbumdur dedikde gıbbe’s-suâl mezbûr el-Hâc Ma‘den cevâbında fi’l-vâki‘ kazıyye vech-i mübeyyen üzre olup lâkin meblağ-ı mezbûr yüz kırk altı buçuk guruşunu dahi <> müdde‘î-i mezbûrun gāib ani’l-meclis vekîli Mahmud Ağa’ya kasaba-i mezbûrede def‘ ve teslîm etmişidim deyü def‘le mukābele edicek gıbbe’l-istintâk ve’l-inkâr mezbûr el-Hâc Ma‘den’den def‘-i mezbûrunu mübeyyine beyyine taleb olundukda ityân-ı beyyine için istimhâl etmeğin mehl-i şer‘î birle imhâl olunup mâ-vaka‘a bi’t-taleb ketb olundu. Fî 14 Rebî‘ülâhir sene [10]91. Şuhûdü’l-hâl: Mehmed Çelebi b. Haydar, Ahmed Çelebi b. Şa‘ban, Mustafa Çelebi b. Ahmed, İsmail Bey b. Kurd, Mustafa Çelebi b. ( ), Ömer Ağa b. ( ).