Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 395 Hüküm no: 375 Orijinal metin no: [82b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdullah Efendi b. Mehmed’in, hâlen Abdurrahman Efendi b. Mehmed’in karısı olan Saliha bt. Abdullah adlı cariyesini daha evvel azat ettiğini ikrar ettiği Husûs-ı âti’l-beyânın mahâllinde tahrîri iltimâs olunmağın savb-ı şer‘-i mergūbdan irsâl olunan Mevlânâ Hüseyin Efendi b. Himmet mahmiye-i İstanbul’da Hadîce Sultân Mahallesi’nde sâkin Abdurrahman Efendi b. Mehmed nâm kimesnenin menziline varıp zeyl-i kitâbda muharrerü’l-esâmî olan Müslimîn huzûrlarında akd-i meclis-i şer‘-i mübîn eyledikde mahalle-i mezbûrede sâkin Abdullah Efendi b. Mehmed nâm kimesne meclis-i ma‘kūd-ı mezbûrda mezbûr Abdurrahman Efendi mahzarında bi’t-tav‘i’s-sâf ikrâr ve takrîr-i kelâm edip mezbûr Abdurrahman Efendi’nin hâlâ zevce-i menkûhası olan uzun boylu gök elâ göz[lü] açık kaşlı Rusiyyetü’l-asl Sâliha bt. Abdullah benim câriye-i memlûkem olmağla bundan akdem mevsûfe-i mezbûre Sâliha’yı hasbeten lillâhi’l-Meliki’l-Hallâk ve taleben li-merzâti’r-Rabbi’r-Rezzâk mâlımdan âzad ve mülkümden ihrâc ve sâir harâir-i asliyât zümresine ilhâk ve idrâc etmişidim mezbûre Sâliha sâir harâir-i asliyât gibi hürre olmağla üzerinde velâ-i şer‘îden gayrı hakkım kalmamışdır dedikde gıbbe’t-tasdîkı’ş-şer‘î husûs-ı mezbûru mevlânâ-yı mezbûr mahâllinde tahrîr ba‘dehû ma‘an irsâl olunan Mahmud Çelebi ile meclis-i şer‘a gelip alâ-vukū‘ihî inhâ ve takrîr etmeğin mâ-hüve’l-vâki‘ bi’t-taleb ketb olundu. Fi’l-yevmi’r-râbi‘ min-şehri Rebî‘i’l-âhir li-sene ihdâ ve tis‘în ve elf. Şuhûdü’l-hâl: es-Sâbıkūn.