Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 106 Hüküm no: 69 Orijinal metin no: [15a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Marad v. Safer isimli Ermeni hakkında şikâyet Mahmiye-i İstanbul’da Sulumanastır kurbünde sâkin İsayi v. Kirkor nâm Ermeni mahmiye-i mezbûrede meclis-i şer‘de Marad v. Safer nâm Ermeni muvâcehesinde üzerine da‘vâ ve takrîr-i kelâm edip mezbûr Marad bi-gayrı vech-i şer‘î bana nice iftirâ edip defa‘âtle ahz u habsetdirip ta‘cîz eylediğinden mâ‘adâ şerîr ve telbîs olup dâimâ ibâdullahı rencîde ve hilâf-ı şer‘î iftirâdan hâlî değildir. İşbu yedimde olan fermân-ı âlî mûcebince keyfiyet-i ahvâl işbu hâzirûn bi’l-meclis olan bî-garaz kimesnelerden suâl olunup takrîrleri tahrîr olunmak matlûbumdur dedikde fi’l-hakīka mezbûr Marat’ın keyfiyet-i hâli Mustafa Çelebi b. Abdullah ve İsmail Beşe b. Mustafa ve Hüseyin Beşe b. Hasan ve Ali b. Mehmed b. Mehmed ve el-Hâc Ömer b. Ramazan nâm kimesnelerden ve Mardıros v. Haçok ve Savet v. Abram ve Bogos v. Markar ve Bali v. Simaven ve Simaven v. Kirkor ve Avanis v. Kurd ve Haçador v. Kirkor ve Melkon v. Toma ve Hürmüz v. Abraham ve Mardıros v. Norsez nâm Ermenilerden suâl olundukda mezbûr Marat şerîr ve telbîs olup nice ibâdullahı tezvîr da‘vâlar ile iftirâdan hâlî değildir deyü her biri bu vech üzere sû-i hâlini alâ-tarîkı’ş-şehâde haber vermeleriyle mâ-vaka‘a bi’t-taleb ketb olundu. Fî 27 min-Muharremü’l-haram sene 1116 Şuhûdü’l-hâl: Hüseyin Efendi b. Himmet, İsmail Efendi kâtib, Ömer Efendi b. Ali, Veli Efendi el-kādı.