Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 106 Hüküm no: 70 Orijinal metin no: [15a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Afife bt. Hasan’ın menzilini Mehmed Bey’e satması Mahmiye-i İstanbul’da Karagümrük kurbünde Hadîce Sultân mahâllesinde sâkine olup zâtı ba‘de’t-ta‘rîfi’ş-şer‘î Afife bt. Hasan nâm hatun mahmiye-i mezbûrede meclis-i şer‘-i hatîrde işbu râfi‘ü’l-kitâb Mehmed Bey b. Ali nâm kimesne mahzarında ikrâr ve takrîr-i kelâm edip bey‘-i âtî sudûruna değin yedimde mülküm ve hakkım olup mahmiye-i mezbûrede Kefeli mahâllesinde vâki‘ bir tarafdan Fâtıma Hatun menzili ve bir tarafdan Lütfü Hatun menzili, [ve bir tarafdan] Emetullah Hatun menzili ve bir tarafdan tarîk-i âm ile mahdûd fevkānî iki bâb oda ve tahtânî bir bâb oda ve müşterek su kuyusu ve kenîf ve havluyu müştemil mülk menzilimi bi-cümleti’t-tevâbi‘ ve’l-levâhık tarafeynden îcâb ve kabûlü hâvî bey‘-i kat‘î ile mezbûr Mehmed Bey’e iki yüz kırk beş guruşa bey‘ ve teslîm ve temlîk edip ol dahi ber-vech-i muharrer iştirâ ve tesellüm ve temellük ve kabûl eyledikden sonra semeni olan meblağ-ı mezbûr ik iyüz kırk beş guruşu mezbûr Mehmed Bey yedinden tamâmen ahz u kabz eyledim. Ba‘de’l-yevm menzil-i mahdûd-ı mezkûr mezbûr Mehmed Bey’in mülk-i müşterâsıdır, keyfe mâ yeşâ ve yahtâr mutasarrıf olsun dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fi’l-yevmi’t-tâsi‘ ve’l-ışrîn min-Muharremü’l-haram sene 1116 Şuhûdü’l-hâl: Ahmed Efendi el-imâm, Mustafa Odabaşı b. Mehmed, Ahmed Çelebi b. Piri, İbrahim b. Hüdaverdi, Hüseyin Çelebi b. Hasan.