Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 108 Hüküm no: 73 Orijinal metin no: [15b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed ve kardeşi Hüseyin’in Biga’daki Defterdar Nureddin Evkafı mütevelliliğini Ali b. Mehmed’e devretmeleri Vilâyet-i Anadolu’da nefs-i Biga kasabası ahâlîsinden olup kendi tarafından asâleten ve karındaşı Mehmed ile Hüseyin b. Ma‘den nâm kimesneler taraflarından husûs-ı âti’l-beyana vekîl olduğu Süleyman b. Mustafa ve Halil b. Süleyman nâm şehâdetleriyle şer‘an vekâleti sâbit olan Ahmed b. Mustafa nâm kimesne mahmiye-i İstanbul’da meclis-i şer‘de işbu râfi‘ü’l-vesîka el-Hâc Ali b. Mehmed nâm kimesne mahzarında bi’l-asâle ve bi’l-vekâle ikrâr ve takrîr-i kelâm [edip] kazâ-i mezbûrda ve Cisr-i Ergene’de vâki‘ Nureddin Defterî Evkāfı’nın biz berat-ı âlîşân ile ale’l-iştirâk ber-vech-i meşrût evlâd-ı vâkıfdan olmak zu‘muyla mütevellîleri olup lâkin biz evlâd-ı vâkıf-ı mezbûrdan olmayıp <> bir vechile tevliyet-i mezbûrede alâka ve medhalimiz dahi olmadığına binâen ancak nefs-i Biga’da vâki‘ evkāf-ı mezbûrenin tevliyetini asâleten ve vekâleten hüsn-i rızâmız ile merkūm el-Hâc Ali’ye ferâğ ve kasr-ı yed edip yedine ber-vech-i muharrer temessük dahi vermişizdir, husûs-ı mezbûra müte‘allık min-ba‘d da‘vâ ve nizâ‘ımız yokdur dedikde, gıbbe’t-tasdîki’ş-şer‘î mâ-vaka‘a bi’t-taleb ketb olundu. Fi’l-yevmi’s-sâmin ve’l-ışrîn min-Muharremü’l-haram sene 1116. Şuhûdü’l-hâl: Ahmed Çelebi b. Ali, Mustafa b. Ahmed, Ali Bey b. Musa, Ahmed Çelebi b. Mehmed, el-Hâc Veli b. Hüseyin, Hüseyin b. Ahmed.