Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 109 Hüküm no: 75 Orijinal metin no: [16a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hassa aşçılarından Ahmed Bey’in Hüseyin Ağa aleyhindeki cariye davasında haksız olduğu Hâssa aşçılarından Ahmed Bey b. Musa nâm kimesne mahmiye-i İstanbul’da meclis-i şer‘-i hatîrde bâ‘isü’l-kitâb Hüseyin Ağa b. Abdurrahman mahzarında üzerine da‘vâ ve takrîr-i kelâm edip mezbûr Hüseyin Ağa târîh-i kitâbdan sekiz sene mukaddem Hezargrad serdârı olmağla benim yüz guruş kıymetli bir re’s Macariyye câriyemi gasben ahz u kabz ve Hezargrad’da vâki‘ menzilinde haremine gönderip câriye-i merkūmem yedinde kalmağın hâlâ câriye-i merkūmem mevcûde ise kendini değil ise ba‘de’s-sübût kıymet-i şer‘iyyesini mezbûr Hüseyin Ağa’dan taleb ederim, suâl olunsun dedikde, gıbbe’s-suâl ve akībe’l-inkâr müdde‘î-i mezbûrdan müdde‘âsına beyyine taleb olundukda ityân-ı beyyineden izhâr-ı acz edip istihlâf etmeğin fi’l-hakīka Hezargrad’da târîh-i mezbûrda serdâr olduğu hâlde müdde‘î-i mezbûrun câriye-i mezkûresini gasben ahz u kabz edip haremine göndermediğine mezbûr Hüseyin Ağa’ya yemîn teklîf olundukda ol dahi hasbe’l-mesûl yemîn billâhi’l-aliyyi’l-a‘lâ etmeğin mûcebince müdde‘î-i mezbûr bilâ-beyyine bî-vech mu‘ârazadan men‘ birle mâ-vaka‘a bi’t-taleb ketb olundu. Fi’l-yevmi’t-tâsi ve’l-ışrîn min-Muharremü’l-haram li-sene sitte aşere ve mi’e ve elf. Şuhûdü’l-hâl: Mehmed Efendi b. Ahmed, İsmail Efendi kâtib, Ömer Efendi b. Ali, el-Hâc Yusuf b. Osman.