Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 109 Hüküm no: 76 Orijinal metin no: [16a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hocaoğlu Mehmed’in Fatıma Hatun’da olan alacağını tahsil etmesi Mahmiye-i İstanbul’da Karabaş mahâllesinde sâkin Hocaoğlu el-Hâc Mehmed b. el-Hâc Muharrem tarafından husûs-ı âti’l-beyana vekîl olduğu el-Hâc Mehmed b. el-Hâc Ahmed ve İbrahim Beşe b. Hüdaverdi nâm kimesneler şehâdetleriyle sâbit ve sübût-ı vekâletine hükm-i şer‘î lâhık olan Mustafa Odabaşı b. Mehmed nâm kimesne mahmiye-i mezbûrede meclis-i şer‘de zâtı şâhidân-ı mezbûrân ta‘rîfleriyle mu‘arrefe olan işbu bâ‘isetü’l-kitâb Fâtıma Hatun bt. Ahmed mahzarında bi’l-vekâle ikrâr ve takrîr-i kelâm edip müvekkil-i mezbûr el-Hâc Mehmed’in işbu yedimde olan hüccet-i şer‘iyye nâtık olduğu üzere cihet-i deyn-i şer‘îden mezbûre Fâtıma Hatun’a zimmetinde iki yüz seksen guruş hakkı olup meblağ-ı mezbûrun yüz altmış guruşu mukābelesinde müvekkil-i mezbûr el-Hâc Mehmed bundan akdem mezbûre Fâtıma Hatun’dan evsâfı beynlerinde ma‘lûme Rusiyyetü’l-asl Azman nâm bir câriye alıp yüz yirmi guruşu bâkī kaldığından mâ‘adâ müvekkil-i mezbûr el-Hâc Mehmed’in taht-ı tasarrufunda olup mahâlle-i mezbûrede vâki‘ lede’l-ahâlî ma‘lûmü’l-hudûd Haremeyn-i şerîfeyn Vakfı’ndan olan dâhiliye ve hâriciye fevkānî ve tahtânî odaları ve sofayı ve matbâhı ve mağseli ve kenîf ve su kuyusu ve bahçe ve bir bâb bakkāl dükkânını, menzilini mütevellî-i vakıf izin ve ma‘rifetiyle mezbûre Fâtıma Hatun’a seksen guruş bedel mukābelesinde ferâğ ve tefvîz ol dahi ber-vech-i muharrer tefevvüz ve kabûl eylediğinden sonra cihet-i deyn-i mezbûrdan olan meblağ-ı mezbûr iki yüz seksen guruşdan bâkī kalan yüz yirmi guruş ve bedel-i mezbûr seksen guruş ki cem‘an iki yüz guruşu müvekkil-i mezbûr el-Hâc Mehmed mezbûre Fâtıma Hatun yedinden tamâmen ahz u kabz edip ve târîh-i kitâba gelince mezbûre Fâtıma Hatun ile beynlerinde vâki‘ olan cüz’î ve küllî ma‘lûme ve mechûle cemî‘ hukūka müte‘allıka âmme-i da‘vâdan mezbûre Fâtıma Hatun’un zimmetini ibrâ-i âm ile ibrâ ve iskāt edip ve mezbûre [Fâtıma] Hatun dahi vech-i meşrûh üzere babasından ve anasından intikāl eden mîrâsa ve sâir ma‘lûme ve mechûle hukūka müte‘allıka da‘vâdan müvekkil-i mezbûr el-Hâc Mehmed’in zimmetini ibrâ-i âm ile ibrâ ve iskāt eyledi dedikde gıbbe’t-tasdîki’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’t-tâsi‘ ve’l-ışrîn min-Muharremü’l-haram li-sene sitte aşere ve mi’e ve elf. Şuhûdü’l-hâl: Ahmed Efendi el-imâm, Ahmed Bey b. Piri, Mustafa Beşe b. Hasan, Mehmed Sipâhî b. Ali, Hüseyin b. Hasan, el-Hâc Yusuf b. Osman.