Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 110 Hüküm no: 77 Orijinal metin no: [16a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sunullah Efendi’nin aldığı borç karşılığında evini rehin vermesi (istiğlal) Mahmiye-i İstanbul’da Beyceğiz mahâllesi sükkânından umdetü’l-müderrisîni’l-kirâm Sunullah Efendi b. Ali mahmiye-i mezbûrede meclis-i şer‘-i hatîr-i lâzımü’t-tevkīrde merhûm Mehmed Bahri nâm sâhibü’l-hayrın nukūd-ı mevkūfesine evlâdiyet ve meşrûtiyet üzere mütevellîye olan Şerîfe Hibetullah nâm hatun bt. el-merhûm Mehmed Said Efendi tarafından ikrâr-ı câ’i’z-zikri tasdîka vekîl-i müsecceli olan râfi‘atü’l-kitâb Hoca Emine Hatun bt. Hasan muvâcehesinde ikrâr ve takrîr-i kelâm edip akd-i âtî sudûruna değin yedimde mülküm ve hakkım olup mahâlle-i mezbûrede Debbâğzâde Hasan Çelebi mahâllesinde vâki‘ bir tarafdan Mehmed Efendi b. Süleyman mülkü ve bir tarafdan sadık Efendi menzili ve bir tarafdan Yedekçi Mehmed’in Ağa’nın utekāsına meşrûta vakıf menzil [16b] ve bir tarafı [tarîk-i] âm ile mahdûd iki bâb tahtânî oda ve bir matbâh ve cüneyneyi müştemil menzilimi yüz elli guruşa bi-tarîkı’l-istiğlâl müvekkile-i mezbûre Şerîfe Hibetullah Hatun’a bey‘ ve teslîm ol dahi ber-vech-i muharrer iştirâ ve tesellüm ve kabûl eylediğinden sonra semeni olan meblağ-ı mezbûr yüz elli guruşu mâl-ı vakf-ı mezbûrdan müvekkile-i mezbûre Şerîfe Hibetullah Hatun bana def‘ ü teslîm, ben dahi yedinden ahz u kabz eylediğimden sonra mütevellîye-i mezbûre Şerîfe Hibetullah Hatun ba‘de’t-tahliye ve’t-takābuz menzil-i mezbûru târîh-i kitâbdan bir sene tamâmına değin yirmi iki buçuk guruşa bana icâr ve teslîm ben dahi iştirâ ve tesellüm ve kabûl eyledim dedikde, gıbbe’t-tasdîki’ş-şer‘î mûmâ-ileyh <> Sunullah Efendi’nin oğlu Ali Efendi meclis-i mezkûrda menzil-i mezbûr hakīkatde rehin olmağla meblağ-ı merkūm yüz elli guruşa ve icâre-i mezkûreye emr u kabûlü hâviye kefâlet ile kefil olmağın mâ-hüve’l-vâki‘ bi’t-taleb ketb olundu. Fi’l-yevmi’l-isneyn min-Saferi’l-hayr li-sene sitte aşere ve mi’e ve elf. Şuhûdü’l-hâl: Fahrü’l-müderrisîn Mehmed Efendi b. Süleyman, Umdetü’l-müderrisîn el-Hâc Mehmed Efendi b. Rasul, el-Hâc Mustafa b. Mehmed, Şaban b. Bayram, Mustafa Bey b. Osman, Halil Efendi b. Ali, el-Hâc Rasul b. Mehmed.