Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 111 Hüküm no: 78 Orijinal metin no: [16b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Asani ile eşi Morola’nın, Nikola ve Sava’nın zimmetlerini ibra etmeleri Mahmiye-i İstanbul hısnı ebvâbından Edirnekapısı dâhilinde el-Hâc Muhyiddin mahâllesinde sâkin Asani v. Yorgi nâm zimmî asâleten ve zevcesi Marola bt. Tako nâm Nasrâniye tarafından husûs-ı âti’l-beyana vekîl olduğu zâtını ma‘rifet-i şer‘iyye ile ârifân olan Mehmed Çavuş b. Mustafa ve Mehmed Çelebi b. Mustafa nâm kimesneler şehâdetleriyle sâbit olan es-Seyyid Hasan b. İsmail nâm kimesne vekâleten mahmiye-i mezbûrede meclis-i şer‘-i hatîrde işbu bâ‘iseyi’s-sifr Nikola v. Todori ve Sava v. Bünyad nâm zimmîler muvâcehelerinde her biri ikrâr-ı tam ve takrîr-i kelâm edip mezbûrân Nikola ve Sava târîh-i kitâbdan dört gün mukaddem mahâlle-i mezbûrede vâki‘ mezbûre Marola’nın sâkine olduğu menziline girip üzerine hücûm ve tahvîf etmeleriyle mezbûre Marola havfından nâşî iskāt-ı cenîn etmişidi deyü mûceb-i şer‘îsini mezbûrân Nikola ve Sava’dan asâleten ve vekâleten da‘vâ ve taleb eylediğimizde onlar dahi husûs-ı mezbûru bi’l-külliye inkâr etmeleriyle beynimizde nizâ‘-ı küllî vâki‘ olmuş idi. El-hâletü hâzihi husûs-ı mezbûra müte‘allıka âmme-i da‘vâdan her birimiz asâleten ve vekâleten mezbûrân Nikola ve Sava’nın zimmetlerini ibrâ-i âm ile ibrâ ve iskāt eyledik dediklerinde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî-selhi Muharremü’l-haram sene 1116 Şuhûdü’l-hâl: İmam Ahmed Efendi b. Abdülkadir, Ebubekir Halîfe el-müezzin, Abdurrahman Çelebi b. Süleyman, Hacı Yusuf b. Mehmed, Mustafa Çelebi b. Abdullah, Papa Kostantin v. Hıriso, Vasil v. Petro,