Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 112 Hüküm no: 79 Orijinal metin no: [16b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Despino v. Dimitri’nin, vefat eden mûrisi Praşkova’nın terekesinden hissesini tamamen teslim aldığı Mahmiye-i İstanbul’da Kumkapı kurbünde Tavâşî Süleyman Ağa mahâllesi sâkinelerinden bundan akdem hâlike olan Praşkova bt. Zoleti nâm Nasrâniyenin zevc-i metrûku Veled Pirlo ile sulbiye sagīre kızı Tobi’ye ve anasının anası Despina bt. Dimitri’ye ve li-ebin kız karındaşları Fatoni ve Ogolu ve Maryora ve Susanna nâm Nasrâniyelere münhasıra olduğu lede’ş-şer‘ zâhir oldukdan sonra mezbûre Despina tarafından husûs-ı âti’l-beyana vekîl olduğu zâtını ma‘rifet-i şer‘iyye ile ârifân Yani v. Panayot ve diğer Yani v. Hıristo nâm zimmîler şehâdetleri ile şer‘an sâbit olan Dimitri v. İstamat nâm zimmî mahmiye-i mezbûrede meclis-i şer‘de sagīre-i mezbûrenin kıbel-i şer‘den mansûb vasîsi olup tereke-i hâlike-i mezbûreye vâzı‘ü’l-yed olan işbu râfi‘ü’s-sifr Papa mezbûr Yorgi muvâcehesinde bi’l-vekâle ikrâr ve takrîr-i kelâm edip hâlike-i mezbûre Praşko’nun terekesinden işbu mümzâ ve mahtûm defter-i kassâm nâtık olduğu üzere müvekkile-i mezbûre Despina’nın hissesine isâbet ve intikāl eden on üç bin iki yüz altmış yedi akçeyi mezbûr Yorgi tereke-i hâlike-i mezbûreden müvekkile-i mezbûre Despina’ya def‘ ü teslîm ol dahi tamâmen ahz u kabz eyledikden sonra tereke-i hâlike-i mezbûreye müte‘allıka âmme-i da‘vâdan mezbûr Yorgi’nin ve sâir verese-i mezkûrûnun zimmetlerini [ibrâ] ve iskāt edip müvekkile-i mezbûre husûs-ı mezbûra müte‘allıka aslâ da‘vâ ve nizâ‘ı yokdur dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fi’l-yevmi’s-sânî min-Saferi’l-hayr li-sene 1116. Şuhûdü’l-hâl: Hüseyin Efendi b. Himmet, el-Hâc Mehmed Efendi el-kādı, Ömer Efendi b. Ali, İsmail Efendi el-kâtib, el-Hâc Yusuf b. Osman, Dimitri v. Panayot, Rizo v. İskerlet, Yanaki v. Estero, Yani v. Panayot.