Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 112 Hüküm no: 80 Orijinal metin no: [17a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yorgi v. İstemat’ın Yorgi v. Piryo ile aralarındaki arsa anlaşmazlığının sulh yoluyla çözülmesi Mahmiye-i İstanbul’da Kumkapı dâhilinde Tavâşî Süleyman Ağa mahâllesi sâkinlerinden Yorgi v. İstemat nâm zimmî mahmiye-i mezbûrede meclis-i şer‘de zikri âtî menzil arsasına vâzı‘ü’l-yed olan işbu râfi‘ü’r-rakīm Yorgi v. Piryo nâm zimmî muvâcehesinde ikrâr ve takrîr-i kelâm edip mahmiye-i mezbûrede Fenerkapısı dâhilinde Abdi Subaşı mahâllesinde vâki‘ bir tarafdan Kel Reis nâm zimmî menzili ve bir tarafdan Arabacı Yani nâm zimmî menzili ve bir tarafdan kal‘a duvarı ve bir tarafdan tarîk-i âm ile mahdûd mülk menzil arsası babam olup bundan akdem hâlik olan İstemat nâm zimmînin yedinde mülkü olup ba‘de-helâkihi bana intikāl etmekle menzil-i mahdûd-ı mezkûrun arsasını fuzûlen mezbûr Yorgi zabt etmekle ben dahi taleb ve da‘vâ eylediğimde ol dahi ( ) nâm zimmîden semen-i ma‘lûme ve makbûza iştirâ ve tesellüm edip ol vechile mülk-i müşterâsı olmak üzere zabt ve tasarrufunu ikrâr eylediğinde beynimizde münâza‘ât-ı kesîre vâkı‘a olmuş idi. El-hâletü hâzihi da‘vâ-i mezkûremden beni vesâtet-i muslihîn ile elli iki buçuk guruş üzerine sulh eylediklerinde ben dahi sulh-ı mezbûru kabûl ve bedel-i sulh olan meblağ-ı mezbûru yedinden tamâmen ahz u kabz eyledikden sonra arsa-i menzil-i mahdûda müte‘allıka âmme-i da‘vâdan mezbûr Yorgi’nin zimmetini ibrâ-i âmm-ı kātı‘ü’n-nizâ‘la ibrâ ve iskāt eyledim min-ba‘d husûs-ı mezkûra müte‘allıka vechen mine’l-vücûh da‘vâ ve nizâ‘ım kalmamışdır dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fi’l-yevmi’s-sâlis min-Saferi’l-hayr li-sene sitte aşere ve mi’e ve elf. Şuhûdü’l-hâl: Es-sâbıkūn.