Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 154 Hüküm no: 98 Orijinal metin no: [26b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Halil b. Mustafa’nın Gönen kadısı Nuh Efendi hakkındaki alacak davasının reddedilmesi Vilâyet-i Anadolu’da Gönen kazâsına tâbi‘ Sarıköy nâm karye ahâlîsinden Halil b. Mustafa nâm kimesne mahmiye-i İstanbul’da meclis-i şer‘-i hatîrde sâbıkā Gönen kādısı olan işbu bâ‘isü’l-vesîka Nuh Efendi b. Musa mahzarında üzerine da‘vâ ve takrîr-i kelâm edip mezbûr Nuh Efendi bundan akdem kazâ-i mezbûr kādısı iken karındaşım Ali nâm kimesne fevt olmağla müteveffâ-yı mezbûrun muhallefâtını mezbûr Nuh Efendi ba‘de’t-tahrîr ancak yüz seksen guruşa bâliğ olup meblağ-ı mezbûrun resm-i âdîsi altı guruş iken mezbûr Nuh Efendi kanâ‘at etmeyip resm-i âdîsinden ziyâde benden on dokuz guruş [ahz] eylemişdir, suâl olunup alıverilmesi matlûbumdur dedikde, gıbbe’s-suâl mezbûr Nuh Efendi cevâbında müteveffâ-yı mezbûrun muhallefâtından ancak altı guruş resm-i âdîden ziyâde on dokuz guruş aldığını bi’l-külliye inkâr edicek müdde‘î-i mezbûrdan müdde‘âsını mübeyyine beyyine taleb olundukda ityân-ı beyyineden [27a] izhâr-ı acz ile istihlâf etmeğin mezbûr Nuh Efendi’ye müteveffâ-yı mezbûrun muhallefâtından resm-i âdîsinden ziyâde müdde‘î-i mezbûrdan on dokuz guruş almadığına yemîn teklîf olundukda ol dahi alâ-vefkı’l-mesûl yemîn billâhi’l-aliyyi’l-a‘lâ etmeğin mûcebince müdde‘î-i mezbûr bilâ-beyyine bî-vech mu‘ârazadan men‘ birle mâ-vaka‘a bi’t-taleb ketb olundu. Fi’l-yevmi’t-tâsi‘ min-Saferi’l-hayr li-sene 1116. Şuhûdü’l-hâl: Hüseyin Efendi b. Himmet, el-Hâc Mehmed Efendi el-kâtib, Veliyüddin Efendi el-kādı, Mehmed Efendi el-kâtib, Ömer Efendi el-kâtib, el-Hâc Yusuf b. Osman.