Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 155 Hüküm no: 99 Orijinal metin no: [27a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ermeni Marat ve İsayi’nin birbirlerinin zimmetlerini ibra etmeleri Mahmiye-i İstanbul’da Sulumanastır kurbünde Sancaktar mahâllesi sâkinlerinden Marat v. Safer nâm Ermeni mahmiye-i mezbûrede meclis-i şer‘de İsayi v. Kirkor nâm Ermeni muvâcehesinde ikrâr ve takrîr-i kelâm edip bundan akdem mezbûr İsayi benim için, sen beni hilâf-ı şer‘î rencîde eylediğinden mâ‘adâ sâir ibâdullahı nice telbîs ve tezvîr da‘vâlar ile iftirâ etmenle benim ber-vech-i muharrer keyfiyet-i ahvâlim istihbâr ve bu vech üzere bî-garaz kimesnelerin verdikleri haber tahrîr olunmuş idi. El-hâletü hâzihi ba‘de’l-yevm mezbûr İsayi’ye ve âhara hilâf-ı şer‘î ta‘addî ve tecâvüz etmeyip ve mesâlihlerine min-ba‘d karışmayıp ve kimesnenin da‘vâsına vekîl olmamak üzere ta‘ahhüd eylediğimden sonra beynimizde ma‘lûm zimmetinde hakkım olan meblağ-ı ma‘lûmü’l-mikdâra ve sâir hukūk-ı ma‘lûme ve mechûleye müte‘allıka âmme-i da‘vâdan mezbûr İsayi’nin zimmetini ibrâ ve iskāt edip ol dahi benim zimmetimi ibrâ ve iskāt eyledi dedikde, gıbbe’t-tasdîki’ş-şer‘î mâ-vaka‘a bi’t-taleb ketb olundu. Fi’l-yevmi’t-tâsi‘ min-Saferi’l-hayr li-sene sitte aşere ve mi’e ve elf. Şuhûdü’l-hâl: Ahmed Çelebi Mehmed, Mehmed Efendi b. Mustafa, Mustafa Bey b. Ali, Yusuf Çelebi b. Abdullah, Mehmed Bey b. Mustafa, Mustafa Çavuş b. Murad, Veyis Çelebi b. Mustafa, Matyos v. Merkiz Yani v. Semaven, Haçador v. Kitostor, Mardıros v. Moçi