Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 156 Hüküm no: 100 Orijinal metin no: [27a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe bt. Mehmed’in, Hüseyin Beşe’den istiğlal yoluyla borç aldığı Mahmiye-i İstanbul’da Debbâğzâde el-Hâc Hasan mahâllesi sâkinelerinden Âişe bt. Mehmed nâm hatun tarafından husûs-ı âti’l-beyana vekîl olduğu zâtı ma‘rifet-i şer‘iyye ile ârifân es-Seyyid Mehmed Efendi b. Receb ve Mehmed b. Ömer nâm kimesneler şehâdetleri ile sâbit olan Abdurrahman Efendi b. Hanifi nâm kimesne mahmiye-i mezbûrede meclis-i şer‘de işbu râfi‘ü’l-vesîka Hüseyin Beşe b. Receb nâm kimesne mahzarında bi’l-vekâle ikrâr ve takrîr-i kelâm [edip] müvekkilem mezbûrenin yedinde mülkü olup mahâlle-i mezbûrede vâki‘ bir tarafdan Süleyman Efendi mülkü ve bir tarafdan Kayıkçı Mehmed nâm kimesnenin tasarrufunda olan vakıf menzil ve bir tarafdan ba‘zan Salih nâm kimesne menzili ve ba‘zan imama meşrûta vakıf menzil ve bir tarafdan tarîk-i âm ile mahdûd ve fevkānî iki bâb oda ve bir sofa ve tahtânî iki bâb oda ve bi’r-i mâ ve bahçe ve havluyu müştemil mülk menzilini mezbûr Hüseyin Beşe’ye bi-tarîkı’l-istiğlâl elli guruşa bey‘ ve teslîm ol dahi ber-vech-i muharrer iştirâ ve tesellüm eyledikden sonra semeni olan meblağ-ı mezbûru merkūm Hüseyin Beşe yedinden tamâmen ba‘de’l-ahz ve’l-kabz menzil-i mahdûd-ı mezkûru gıbbe’t-tahliyeti’ş-şer‘iyye târîh-i kitâbdan bir sene tamâmına değin mezbûr Hüseyin Beşe yedi buçuk guruşa müvekkile-i mezbûre Âişe’ye icâr ve teslîm ol dahi isticâr ve tesellüm ol dahi isticâr ve tesellüm eyledi dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fi’l-yevmi’l-âşir min-Saferi’l-hayr li-sene sitte aşere ve mi’e ve elf. Şuhûdü’l-hâl: Fahrü’l-müderrisîn Uzunîzâde Süleyman Efendi, Murtaza Efendi el-kādı bi-Ahyolu sâbıkā, el-Hâc Osman b. ( ), Çukadâr el-Hâc Ali, el-Hâc Yusuf b. ( ).