Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 156 Hüküm no: 101 Orijinal metin no: [27a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Çelebi’nin, İbrahim Ağa’da olan alacaklarını tahsil etmesi Mahmiye-i İstanbul’da Molla Aşkī mahâllesi ahâlîsinden Ahmed Çelebi [b.] el-Hâc Bayram nâm kimesne mahmiye-i mezbûrede meclis-i şer‘-i hatîr-i lâzımü’t-tevkīrde vilâyet-i Anadolu’da Kürretü’n-nühâs kazâsı ahâlîsinden işbu bâ‘isü’l-kitâb İbrahim Ağa b. el-Hâc Hasan nâm kimesne mahzarında ikrâr ve takrîr-i kelâm edip mezbûr İbrahim Ağa zimmetinde bundan akdem yedinden iştirâ ve kabz e[yled]iği vakiyesi beynimizde ma‘lûm yağ ve üzüm ve incir ve pirinç bahasından cem‘an yekûn iki yüz yetmiş iki guruş hakkım olmağla meblağ-ı mezbûrun iki yüz kırk iki guruşuna mahsûben kazâ-i mezbûrda merkūm İbrahim Ağa’dan kezâlik vakiyesi beynimizde ma‘lûm kükürt ve külçe bakır <> ahz u kabz edip otuz guruşum zimmetinde bâkī kalmış idi. El-hâletü hâzihi merkūm İbrahim meblağ-ı bâkī-i mezbûr otuz guruşu dahi hâlâ bana edâ ve teslîm ben dahi yedinden ahz u kabz edip bu vech üzere meblağ-ı mecmû‘-ı mezbûr iki yüz yetmiş iki guruşu merkūm İbrahim Ağa yedinden tamâmen ahz u istifâ eyledim, ba‘de’l-yevm meblağ-ı mecmû‘-ı mezbûrdan bir akçe hakkım bâkī kalmayıp hukūk-ı mezbûra müte‘allıka âmme-i da‘vâdan mezbûr İbrahim Ağa’nın zimmetini ibrâ ve iskāt eyledim dedikde, gıbbe’t-tasdîki’ş-şer‘î mâ-vaka‘a bi’t-taleb ketb olundu. Fi’l-âşir min-Saferi’l-hayr li-sene sitte aşere ve mi’e ve elf. Şuhûdü’l-hâl: Osman Efendi b. Mehmed, Hasan Ağa b. Mehmed, Osman Çelebi b. Mehmed, Mehmed Bey b. Mehmed, Hüseyin Beşe b. İbrahim, Ahmed Beşe b. Mahmud, Osman Beşe b. Mustafa, Mehmed Beşe b. Hüseyin, Ahmed Beşe b. İbrahim, Süleyman b. Ahmed.