Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 157 Hüküm no: 102 Orijinal metin no: [27b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bayram b. Abdullah’ın, Süleyman Çelebi aleyhindeki veraset davasının reddedilmesi Mahmiye-i İstanbul’da Bostancıbaşı Ali Ağa mahâllesinde sâkine iken bundan akdem fevt olan Zeyneb bt. Abdullah nâm hatunun mu‘takı olan el-Hâc Mehmed b. İslâm nâm kimesnenin li-ebeveyn ammi oğlu olduğu yedinde mazmûnu müsbet hüccet-i şer‘iyye ile sâbit olup müteveffât-ı mezbûre Zeyneb’in min-ciheti’l-usûbeti’s-sebebiye vârisi olduğuna hükm-i şer‘î lâhık olan Bayram b. Abdülkadir nâm kimesne mahmiye-i mezbûrede meclis-i şer‘de müteveffât-ı mezbûrenin zevc-i metrûku ve terekesine vâzı‘ü’l-yed olan işbu râfi‘ü’l-vesîka Süleyman Çelebi b. Abdullah nâm kimesne mahzarında üzerine da‘vâ ve takrîr-i kelâm edip ben müteveffât-ı mezbûrenin usûbet-i sebebiye cihetiyle vârisi olup diyâr-ı âharda bulunmam ile zevci mezbûr Süleyman Çelebi müteveffât-ı mezbûrenin nakid dört yüz guruşu ile eşyâsından dokuz köhne beledî yasdık ve bir döşek ve üç minder ve üç yorgan ve bir orta keçesi ve on iki tencere ve bir tâbe ve bir leğen ve bir ibrik ve bir çift altın bilezik ve bir sîm kuşağını ve bisât-ı menzil ve evân-ı nühâsiye ve gayr-ı nühâsiye bi’l-cümle e[şyâ]sını ahz u kabz etmekle hâlâ suâl olunup ber-vech-i muharrer müteveffât-ı mezkûrenin tereke-i mezbûresinden bana isâbet eden hisse-i şer‘iyyem alıverilmek matlûbumdur dedikde, gıbbe’s-suâl mezbûr Süleyman Çelebi cevâbında fi’l-hakīka meblağ-ı mezbûr ile eşyâ-yı mezkûre zevcesi müteveffât-ı mezbûrenin yedinde mülkü olduğu hâlde fevtinden mukaddem hâl-i hayâtında ve kemâl-i sıhhatinde bin yüz on beş Şa‘bân’ının on sekizinci gününde huzûr-ı Müslimînde bana hibe-i sahîha-i şer‘iyye ile [hibe] ve temlîk ve teslîm, ben dahi meclis-i hibede ittihâb ve kabz ve kabûl eylediğimden sonra ma‘an sâkin olduğumuz menzil içinde ismi mâl ıtlâk olunur eşyâda kat‘â alâka ve medhalim olmayıp benim için zevcim mezbûr Süleyman Çelebi’nin mülk ve hakkıdır deyü nefy-i mülk eylediğini ikrâr ve bu vech üzere târîh-i mezbûrda Mahmudpaşa Mahkemesi’nde nâibü’ş-şer‘ olan Osman Efendi müteveffât-ı mezbûrenin ikrâr-ı meşrûhunu nâtık yedime işbu hüccet-i şer‘iyyeyi dahi vermekle ber-vech-i muharrer meblağ-ı mezbûr ve eşyâ-yı mezkûre yedimde mülk ve hakkım olmağla vaz‘-ı yed ederim deyü def‘ ve husûs-ı mezbûru nâtık ve târîh-i mezbûr ile müverrah ve mevlânâ-yı mezbûrun imzâ ve hatemini hâvî bir kıt‘a hüccet-i şer‘iyye ibrâz ve ısdâr eyledikde gıbbe’n-nazar ve’l-kırâe ve isre’l-istintâk ve akībe’l-inkâr mezbûr Süleyman Çelebi’den ber-vech-i muharrer hüccet-i mezbûrenin mazmûnuna beyyine taleb olundukda udûl-i ahrâr-ı ricâl-i Müslimînden olup mahmiye-i mezbûrede Hobyar mahâllesi ahâlîsinden ve zeyl-i hüccet-i mezkûrede isimleri mastûr meşhûddan el-Hâc Mehmed b. İdris ve Mahmud b. Ahmed nâm kimesneler li-ecli’ş-şehâde meclis-i şer‘e hâzırân olup istişhâd olunduklarında fi’l-hakīka el-Hâc Mehmed atiki olan müteveffât-ı mezbûre Zeyneb hâl-i hayâtında ve kemâl-i akl [ü] sıhhatinde târîh-i mezbûrda bizim huzûrumuzda malından nakid dört yüz guruş ve dokuz köhne beledî yasdık ve bir döşek ve üç minder ve üç yorgan ve bir orta keçesi ve on sahan ve iki tencere ve bir tâbe ve bir leğen ma‘a ibrik ve bir çift altın bilezik ve bir sîm kuşağını zevci mezbûr Süleyman Çelebi’ye hibe-i sahîha-i şer‘iyye [ile] hibe ve teslîm ol dahi meclis-i hibede ittihâb ve kabz ve tesellüm eylediğinden sonra ma‘an sâkin olduğumuz menzil içinde mevcûd bisât-ı menzil ve esâ[s]-ı beyt ve evân-ı nühâsiye ve gayr-ı nühâsiye ismi mâl ıtlâk olunur eşyâda kat‘â alâka ve medhalim yokdur, zevcim mezbûr Süleyman Çelebi’nin mülk ve hakkıdır deyü müteveffâ-yı mezbûr Zeyneb’in zevci merkūm Süleyman Çelebi’ye nefy-i mülk edip bu vech üzere târîh-i mezbûrda Mahmudpaşa Mahkemesi’nde nâibü’ş-şer‘ olan Osman Efendi müteveffât-ı mezbûrenin ikrâr-ı meşrûhunu nâtık mezbûr Süleyman Çelebi yedine işbu hüccet-i şer‘iyyeyi dahi vermiş idi. Biz mazmûn-ı hüccet-i mezkûreye bu vech üzere şâhidleriz şehâdet dahi ederiz deyü her biri edâ-yı şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm müdde‘î-i mezbûr Bayram ber-vech-i muharrer merkūm Süleyman Çelebi’ye bî-vech mu‘ârazadan men‘ olunup mâ-vaka‘a bi’t-taleb ketb olundu. Fi’l-yevmi’s-sâlis aşer min-Saferi’l-hayr li-sene sitte aşere ve mi’e ve elf. Şuhûdü’l-hâl: Hüseyin Efendi el-kâtib, İsmail Efendi el-kâtib, Halil Çelebi b. Mehmed, Mehmed b. Ali, el-Hâc Abdurrahman b. Ahmed, Ömer Efendi b. Ali, Veliyüddin Efendi el-kādı, el-Hâc Mehmed Efendi kâtib, Mehmed Emin Efendi el-kādı, Ömer Efendi kâtib, el-Hâc Yusuf b. Osman.