Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 169 Hüküm no: 104 Orijinal metin no: [34a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zeynep Hatun’un, menzil ve müştemilatının yarısını eşi Abdullah Çelebi’ye satması Mahmiye-i İstanbul’da Karabaş mahâllesi sâkinelerinden olup zâtını ma‘rifet-i şer‘iyye ile mu‘arrefe olan İsmail Efendi b. Mahmud ve Ebubekir Çelebi b. İbrahim nâm kimesnelere ta‘rîfleriyle mu‘arrefe Zeyneb bt. Eyüb Odabaşı nâm hatun mahmiye-i mezbûrede meclis-i şer‘-i hatîrde işbu bâ‘isü’l-vesîka zevci Abdullah Çelebi b. İbrahim mahzarında ikrâr ve takrîr-i kelâm edip bey‘-i âti’z-zikrin sudûruna değin yedimde mülküm ve hakkım olup mahâlle-i mezbûrede vâki‘ bir tarafdan Meyancı Hasan Beşe mülkü ve bir tarafdan Müyesser Çelebi Mescid-i şerîfi ve bir tarafdan tarîk-i hâs ve bir tarafdan tarîk-i âm ile mahdûd iki bâb fevkānî oda ve bir sofa ve <> odası ve bir matbâh ve kenîf ve bir bâb tahtânî oda ve bir sofa ve bir kilâr ve bi’r-i mâ ve zât-eşcâr-ı müsmire ve gayrı müsmire hadîkayı müştemil mülk menzilimin nısfını zevcim mezbûr Abdullah Çelebi’ye tarafeynden bi’l-îcâb ve’l-kabûl bey‘-i kat‘î ile yüz elli guruşa bey‘ ve teslîm ve temlîk edip ol dahi ber-vech-i muharrer iştirâ ve tesellüm ve temellük ve kabûl eyledikden sonra semeni olan meblağ-ı mezbûr yüz elli guruşu zevcim mezbûr Abdullah Çelebi yedinden tamâmen ahz u kabz eyledim, ba‘de’l-yevm menzil-i mahdûd-ı mezbûrun nısfı zevcim mezbûrun mülk-i müşterâsıdır, keyfe mâ yeşâ ve yahtâr mutasarrıf olsun dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fi’l-yevmi’s-sâlis aşer min-Saferi’l-hayr li-sene sitte aşere ve mi’e ve elf. Şuhûdü’l-hâl: Mehmed Çelebi b. Mustafa, diğer Mehmed Çelebi b. Mustafa, Abdülkadir Efendi b. ( ) Halil Çelebi b. İbrahim, Sarrâc Mehmed Çelebi b. ( ), Takyeci Hüseyin Çelebi b. ( ), el-Hâc Yusuf b. Osman.