Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 173 Hüküm no: 107 Orijinal metin no: [35a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kastamonu’nun Mergüze [İhsangazi] kazası halkından bazılarının Ahmed Efendi ile olan davalarında anlaşma sağlandığı Bâ-imzâ-i hazret-i veliyyü’n-ni‘amî Vilâyet-i Anadolu’da Kastamonu sancağında Mergüze [İhsangazi] kazâsına tâbi‘ Kimene-i kebîr nâm karye ahâlîsinden Mehmed b. Yahya ve Mehmed b. Tayyib ve Mehmed b. Kara Ali ve el-Hâc Mehmed b. el-Hâc Kemâl ve İmam b. Mehmed b. Sindam ve Mehmed b. el-Hâc Nasuh ve el-Hâc Hüseyin b. el-Hâc Bekir ve Şaban b. Murad ve el-Hâc Mehmed b. el-Hâc osman ve Hasan Dede b. Mahmud Dede ve sâirleri taraflarından husûs-ı âti’l-beyana vekîl olduğu el-Hâc Receb b. Şaban ve İsmail Beşe b. Mehmed şehâdetleriyle şer‘an sâbit olan Bali Dede b. Pîr Dede ve Kimene-i sagīr nâm karye ahâlîsinden el-Hâc İsmail b. Maksud ve Ebubekir b. Ebubekir ve Veliyüddin b. Ferhad ve Müezzin Hasan b. Mustafa ve Receb b. Zülfikar ve Köse Abdünnebi b. Osman ve sâirleri kezâlik vekîl olduğu Halil b. Mustafa ve Ali b. Maden şehâdetleri ile şer‘an sâbit olan Mehmed b. el-Hâc İsa ve Ömerisni? nâm karyeden el-Hâc Receb b. Şaban ve İsmail Beşe b. Mehmed ve Mehmed b. Hasan ve Receb b. el-Hâc Osman ve Kara Mehmed b. Receb ve Ebubekir b. Şaban ve Mehmed b. el-Hâc İlyas ve sâirleri taraflarından dahi kezâlik husûs-ı âti’l-beyana vekîl olduğu Mustafa b. Receb ve Ahmed b. Şaban şehâdetleriyle sâbit olan el-Hâc Ahmed b. el-Hâc Mehmed Çalık nâm kimesne mahmiye-i İstanbul’da meclis-i şer‘de işbu râfi‘ü’l-vesîka Ahmed Efendi b. el-Hâc Ali mahzarında her biri bi’l-vekâle ikrâr ve takrîr-i kelâm edip işbu mezbûr Ahmed Efendi on beş seneden beri karyelerimize nâzil olan tekâlîfimizi tarafımızdan edâ [35b] ba‘dehû verdiği akçeyi bundan tedrîc ile bizden ahz u kabz edip bunun emsâli mu‘âmelât ve ahz u i‘tâ üzere olmağla vilâyetimizde ham demirin batmanı yüz zoltaya râyic iken bizim üzerimize yüz yirmişer akçeye olmak üzere dört yüz batman demirini cebren bırakıp ba‘dehû bizden akçesini ahz ve müft [ü] meccânen dağdan yüz elli aded çam direği kat‘ etdirip ve her birimizi yapısında meccânen istihdâm etmekle zikr olunan dört yüz batman demirin birer sülüs ziyâdesiyle yüz elli çamın kıymetlerini ve yapısında işlediğimiz eyyâmda müstahak olduğumuz ücretimizi mezbûr Ahmed Efendi’den taleb ve da‘vâ eylediğimizde ol dahi zikr olunan dört yüz batman demiri benden rızânız ile yüz guruşa iştirâ etmişdiniz ve semeni hâlâ zimmetinizdedir deyü bizden dört yüz batman demirin yüz guruş olmak üzere semenini ahz u kabzını ve ber-vech-i muharrer yüz elli çam kat‘ etdirdiğini ve yapısında istihdâm etdirdiğini bi’l-külliye inkâr etmeğin beynimizde nizâ‘-ı kesîr vâki‘ olmuş idi. El-hâletü hâzihi da‘vâ-i mezkûremizden bi’l-külliye fâriğ olup zikr olunan demir izdiyâdına ve yüz elli aded çama ve ücret-i mezkûremize ve târîh-i kitâba gelince beynimizde cereyân eden sâir hukūk-ı ma‘lûme ve mechûleye müte‘allıka âmme-i da‘vâ ve mutâlebâtdan biz bi’l-vekâle mezbûr Ahmed Efendi’nin zimmetini ibrâ ve iskāt edip mezbûr Ahmed Efendi dahi ber-vech-i muharrer <> bizden iddi‘â eylediği dört yüz batman demir semenine müte‘allıka âmme-i da‘vâdan bizim zimmetimizi ibrâ ve iskāt eyledi, fîmâ-ba‘d tarafeynden her birimizin âhar ile on beş seneden beri karyelerimize nâzil olan tekâlîf hesâbına ve demir semenine ve çamlar kıymetlerine ve ücretimize ve sâir hukūka müte‘allıka aslâ da‘vâ ve nizâ‘ımız yokdur, sudûr ederse lede’l-hükkâm mesmû‘a ve makbûle olmasın dediklerinde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî 13 min-Saferi’l-hayr li-sene 1116. Şuhûdü’l-hâl: Hâfız Mehmed Efendi b. Mehmed, İbrahim Efendi b. el-Hâc İsmail, Mustafa Efendi b. el-Hâc Ali, Mehmed Efendi b. el-Hâc Mehmed, Yahya Efendi b. Hâfız Mehmed, Ahmed Efendi b. Yahya Efendi.