Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 174 Hüküm no: 108 Orijinal metin no: [35b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Toros’un Eğin’indeki tarlasını Bogos, Markos ve Artin’e satması Vilâyet-i Anadolu’da Eğin kazâsına tâbi‘ Navrul [Gümüşçeşme] nâm karye ahâlîsinden olup mahmiye-i İstanbul’da Dörtyol ağzında vâki‘ Ekmekçi fırınında sâkin Toros v. Bogos nâm zimmî mahmiye-i mezbûrede meclis-i şer‘-i hatîr-i lâzımü’t-tevkīrde işbu bâ‘isü’s-sifr Bogos ve Markos ve Artin v. Vatorsez? nâm zimmîler muvâcehelerinde bi-tav‘ihî ikrâr ve takrîr-i kelâm edip ferâğ-ı âti’z-zikrin sudûruna değin taht-ı tasarrufumda olup karye-i mezbûre toprağında vâki‘ bir tarafdan Asvador nâm zimmî tarlası ve bir tarafdan mezbûrûnun tasarrufunda olan tarla ve bir tarafdan bayır ve bir tarafdan [tarîk] ile mahdûd ve mümtâz tahmînen bir dönüm tarlamı ma‘rifet-i sâhib-i arz ile mezbûrûna on yedi guruş bedel-i ma‘lûm [ve] makbûza ferâğ ve tefvîz, onlar dahi ber-vech-i muharrer iştirâk üzere tefevvüz ve kabûl eylediklerinden sonra bedeli olan meblağ-ı mezbûr on yedi guruşu yedlerinden tamâmen ahz u kabz eyledim ba‘de’l-yevm tarla-yı mahdûd-ı mezbûr mezkûrûnun mülk-i müfevvezidir, mahâllinde her birini tasarrufa mezbûrûnu taslît eyledim dedikde, gıbbe’t-tasdîki’l-mu‘teber mâ-vaka‘a bi’t-taleb ketb olundu. Fi’l-yevmi’s-sâdis aşer min-Saferi’l-hayr li-sene sitte aşere ve mi’e ve elf. Şuhûdü’l-hâl: Haydar Bey b. Ahmed, Ömer Çelebi b. Haydar Bey, Mehmed Çelebi b. Osman, el-Hâc Yusuf Estoro v. Bogos, Cagardiş v. Faster?, Aleksan v. Mikail, Hokas v. Mardıros, Mercan v. Melkon.