Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 175 Hüküm no: 109 Orijinal metin no: [35b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Beşe’nin İbrahim Efendi aleyhindeki alacak davasında anlaşma sağlanması Mahrûse-i Galata muzâfâtından kasaba-i Beşiktaş’da Paşa mahâllesi ahâlîsinden Mehmed Beşe b. İbrahim nâm kimesne mahmiye-i İstanbul’da meclis-i şer‘de işbu bâ‘isü’l-vesîka İbrahim Efendi b. Mehmed mahzarında ikrâr ve takrîr-i kelâm edip mezbûr İbrahim Efendi’de cihet-i deyn-i şer‘îden elli guruş hakkım olmağla meblağ-ı mezbûr elli guruşu mezbûr İbrahim Efendi’den taleb ve da‘vâ eylediğimde ol dahi bi’l-külliye inkâr etmekle beynimizde münâza‘ât-ı kesîre vâkı‘a olmuş idi. El-hâletü hâzihi beynimize muslihûn tavassut edip beni müdde‘âm olan meblağ-ı mezbûrdan on guruş üzerine inşâ-i akd-i sulh eylediklerinde ben dahi ber-vech-i muharrer sulh-ı mezbûru kabûl ve bedel-i sulh olan meblağ-ı mezbûru merkūm İbrahim Efendi yedinden tamâmen ahz u kabz eylediğimden sonra ziyâdeye müte‘allıka âmme-i da‘vâdan mezbûr İbrahim Efendi’nin zimmetini ibrâ-i âm ile ibrâ ve iskāt eyledim dedikde, gıbbe’t-tasdîki’ş-şer‘î mâ-vaka‘a bi’t-taleb ketb olundu. Fi’l-yevmi’s-sâmin aşer min-Saferi’l-hayr li-sene sitte aşere ve mi’e ve elf. Şuhûdü’l-hâl: el-Hâc Mehmed b. Derviş, Abdullah Çelebi b. İbrahim. İbrahim Beşe el-mübâşir, Hüseyin Çelebi b. Ali, İbrahim Çelebi b. Mustafa.