Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 175 Hüküm no: 110 Orijinal metin no: [36a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatıma Hatun’un eşi İbrahim Efendi’den boşanması (bâyin) Mahmiye-i İstanbul’da Beyceğiz mahâllesinde sâkine olup zâtı Hüseyin Çelebi b. Ali ve İbrahim Çelebi b. Mustafa nâm kimesneler ta‘rîfleriyle [mu‘arrefe] olan Fâtıma bt. Abdurrahman nâm hatun mahmiye-i mezbûrede meclis-i şer‘-i hatîrde zevc-i mutallıkı işbu bâ‘isü’l-vesîka İbrahim Efendi b. Mehmed nâm kimesne mahzarında ikrâr ve takrîr-i kelâm edip merkūm İbrahim Efendi mukaddemâ beni talâk-ı bâin ile tatlîk etmekle zimmetinde mütekarrir ve ma‘kūdün-aleyh olan mehr-i müeccelim yirmi beş guruş ile nafaka-i iddet-i ma‘lûmem <<üzerlerine>> ve meûnet-i süknâm mukābelesinde bi’t-terâzî ta‘yîn olunan beş guruş ki cem‘an otuz guruşu mezbûr İbrahim Efendi yedinden ahz u kabz eylediğimden sonra bundan akdem beynimizde cârî olan ahz u i‘tâdan [ve] eşyâ-yı ma‘lûme bahasından dahi mezbûr İbrahim Efendi zimmetinde yüz otuz beş guruş hakkım olmağla meblağ-ı mezbûrdan bi-tarîkı’s-sulh merkūm İbrahim Efendi’den hâlâ on guruş dahi alıp kabz edip meblağ-ı mezbûr yüz otuz beş guruşdan bâkī kalan yüz yirmi beş guruşa ve hukūk-ı zevciyete ve beynimizde cârî olan sâir hukūk-ı ma‘lûme ve mechûleye müte‘allıka âmme-i da‘vâdan her birimiz âharın zimmetini ibrâ ve iskāt eyledik dedikde, gıbbe’t-tasdîki’ş-şer‘î mâ-vaka‘a bi’t-taleb ketb olundu. Fi’l-yevmi’s-sâmin aşer min-Saferi’l-hayr li-sene sitte aşere ve mi’e ve elf. Şuhûdü’l-hâl: el-Hâc Mehmed b. Derviş, Abdullah Çelebi b. İbrahim, İbrahim Beşe b. el-mübâşir, Hüseyin Çelebi b. Ali, İbrahim Çelebi b. Mustafa.