Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 176 Hüküm no: 111 Orijinal metin no: [36a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İvaz b. Abdullah’ın, Mehmed Çelebi aleyhindeki alacak davasının reddedilmesi Medîne-i Üsküdar kazâsına tâbi‘ kasaba-i Gekbûze mahâllâtından Güzeller mahâllesi ahâlîsinden olup zikri âtî müteveffânın mu‘takı İvaz b. Abdullah nâm kimesne mahmiye-i İstanbul’da meclis-i şer‘de mahâlle-i mezbûrede sâkin iken bundan akdem fevt olan el-Hâc Ahmed Odabaşı b. el-Hâc Mustafa nâm kimesnenin verâseti zevce-i metrûkesi Âişe bt. el-Hâc Ahmed nâm hatun ile sulbî sagīr oğulları Hüseyin ve Mustafa ve Hasan’a ve sagīre kızı Saliha’ya münhasıra olduğu şer‘an zâhir ve müte‘ayyin oldukdan sonra işbu bâ‘isü’l-vesîka mezbûr Mehmed mahzarında üzerine da‘vâ ve takrîr-i kelâm edip mevlâm müteveffâ-yı mezbûr hâl-i hayâtında kendüye dört sene hizmet etmek üzere beni kitâbete kat‘ edip ben dahi ba‘de’l-kabûl hayâtında üç sene dokuz ay kendüye ve ba‘de’l-vefât verese-i mezkûresine üç ay hizmet edip bu vech üzere müddet-i mezkûre tamâm ve ben sâir harâir-i asliyyîn gibi hür olmuş iken mezbûr Mehmed asâleten ve sagīrûn-ı mezbûrûnun vasîleri olan anaları mezbûre Âişe tarafından vekîlim deyü benden bi-gayrı hakkın seksen guruşumu ahz u kabz etmişdir, suâl olunup alıverilmesi murâdımdır dedikde gıbbe’s-suâl mezbûr Mehmed Çelebi cevâbında fi’l-hakīka müdde‘î-i mezbûrdan asâleten ve vekâleten seksen guruşunu ahz u kabz eylediğini ikrâr, lâkin mezbûr İvaz babam müteveffâ-yı mezbûrun hayâtında çoban kethüdâsı olmağla terekesinden iki yüz guruşluk eşyâsını ahz ve istihlâk etmekle asâlet ve vekâletim hasebiyle meblağ-ı merkūmu mezbûr İvaz’dan taleb ve da‘vâ, ol dahi inkâr ve ben müdde‘âmı isbâta kādir olmayıp ol dahi yemîn etmesi emr-i mukarrer olup sulh her vechile evlâ ve ahrâ olmağın tavassut-ı muslihîn ile da‘vâ-i mezkûremden merkūm İvaz benimle seksen guruş üzerine akd-i musâlaha eyledikde ben dahi sulh-ı mezbûru ba‘de’l-kabûl bedel-i sulh olmak üzere meblağ-ı merkūm seksen guruşu yedinden ahz u kabz eyledim deyü def‘le mukābele edicek gıbbe’l-istintâk ve’l-inkâr mezbûr Mehmed Çelebi’den def‘-i mezkûrunu mübeyyine beyyine taleb eyledikde udûl-i ahrâr-ı ricâl-i Müslimînden olup mahâlle-i mezbûrede sâkin Mustafa Efendi b. Bâyezid ve Hüseyin Çelebi b. Mustafa nâm kimesneler li-ecli’ş-şehâde meclis-i şer‘e hâzırân olup isre’l-istişhâd fi’l-vâki‘ mezbûr Mehmed Çelebi babam müteveffâ-yı mezbûrun terekesinden iki yüz guruşluk eşyâsını ahz ve istihlâk eyledin deyü mezkûr İvaz’dan taleb ve da‘vâ, ol dahi inkâr etmekle mezbûr Mehmed Çelebi vech-i meşrûh üzere müdde‘âsını isbâtdan âciz oldukda da‘vâ-i mezkûresinden merkūm İvaz seksen guruşa bizim huzûrumuzda akd-i musâlaha edip, ol dahi asâleten ve vekâleten sulh-ı mezkûru kabûl ve merkūm İvaz bedel-i sulh olmak üzere mezbûr Mehmed Çelebi’ye seksen guruş def‘ ü teslîm, ol dahi yedinden tamâmen ahz u kabz edip bizi işhâd eyledi, biz bu husûsa bu vech üzere şâhidleriz şehâdet dahi ederiz deyü her biri edâ-yı şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri makbûle olmağın mûcebiyle mezbûr İvaz Bey bî-vech mu‘ârazadan men‘ birle mâ-vaka‘a bi’t-taleb ketb olundu. Fi’l-yevmi’l-işrîn min-Saferi’l-hayr sene sitte aşer ve mi’e ve elf. Şuhûdü’l-hâl: Veli b. Ahmed, Ali Bey b. Mehmed, Receb b. Ahmed, Mustafa b. Ali, el-Hâc Yusuf b. Osman.