Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 177 Hüküm no: 112 Orijinal metin no: [36b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kostantin v. Dimitri’nin kalan borcunu ödemesi gerektiği Tâife-i Yahûdun Sinora cemâ‘atinden olup mahmiye-i İstanbul’da Balat kapısı dâhilinde sâkin Avadya v. Bayram ve Yako v. Hayk ve İsak v. Haym nâm Yahûdîler mahmiye-i mezbûrede meclis-i şer‘de Havâss-ı aliyye kazâsına tâbi‘ Litroz nâm karye ahâlîsinden Kostantin v. Dimitri nâm zimmî muvâcehesinde her biri üzerine da‘vâ ve takrîr-i kelâm edip bundan akdem mezbûr Kostantin’e malımızdan iki yüz otuz guruş ikrâz ve teslîm, ol dahi yedimizden istikrâz ve kabz ve masârıfına sarfla ba‘de’l-istihlâk zimmetinde hakkımız olup hattâ yedimize deyn temessükü dahi vermekle hâlâ suâl olunup alıverilmesi matlûbumuzdur dediklerinde gıbbe’s-suâl mezbûr Kostantin cevâbında fi’l-vâki‘ müdde‘iyûn-ı mezbûrûna cihet-i mezbûreden zimmetinde iki yüz otuz guruş deyni olduğunu ikrâr lâkin meblağ-ı mezbûr seksen guruşluk cedîd zolta ile otuz guruşluk para ki cem‘an iki yüz on guruşunu târîh-i kitâbdan altmış gün mukaddem karye-i mezbûrede mahzar-ı şuhûdda müdde‘iyûn-ı mezbûrûna edâ ve teslîm edip ancak zimmetimde bâkī yirmi guruş deynim kalmışdır deyü meblağ-ı mezbûrun iki yüz on guruşunda def‘le mukābele edicek gıbbe’l-istintâk ve’l-inkār mezbûr Kostantin’den def‘-i mezkûruna beyyine taleb olundukda udûlden olup karye-i mezbûre ahâlîsinden Kostantin v. Dimitri ve Aleksi v. Nikola ve Hıristo v. Panayot ve Dimitri v. Yani nâm zimmîler li-ecli’ş-şehâde meclis-i şer‘e hâzirûn olup istişhâd olunduklarında fi’l-hakīka mezbûr Kostantin târîh-i mezkûrda karye-i merkūmede müdde‘iyûn-ı mezbûrûna bizim huzûrumuzda zimmetinde deyni olan meblağ-ı mezbûr iki yüz otuz guruşun yüz seksen guruşluk cedîd zolta ile otuz guruşluk para ki cem‘an iki yüz on guruşunu edâ ve teslîm, onlar dahi yedinden ahz u kabz eyledi[ler] biz bu husûsa bu vech üzere şâhidleriz şehâdet dahi ederiz deyü her biri edâ-yı şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm meblağ-ı bâkī-i mezbûr yüz yirmi guruşu müdde‘iyûn-ı mezbûrûna edâ ve teslîme mezbûr Kostantin’e tenbîh olunup mâ-vaka‘a bi’t-taleb ketb olundu. Fi’l-yevmi’l-hâmis aşer min-Saferi’l-hayr sene 1116. Şuhûdü’l-hâl: Ahmed b. Muslı, İbrahim Çelebi b. Ebubekir, Süleyman Bey b. Eyüb, Mustafa Beşe b. Hasan.