Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 178 Hüküm no: 113 Orijinal metin no: [36b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Alime bt. Ahmed’in varislerinin menzil hisselerini Mahmud Çelebi’ye satmaları Mahmiye-i İstanbul’da Çıkrıkçı Kemâl mahâllesinde sâkine iken bundan akdem vefât eden Alime bt. Ahmed Efendi nâm hatunun verâseti zevc-i metrûku Mehmed Efendi b. Abdurrahman’a ve sadriye kebîre kızları Âişe ve Hibetullah ve Fâtıma benât-ı Mehmed Efendi’ye ve li-ebin kız karındaşı diğer Fâtıma nâm hatuna münhasıra ba‘dehâ mezbûre Hibetullah Hatun dahi vefât edip verâseti ancak babası mezbûr Mehmed Efendi’ye münhasıra ve tashîh-i meselesi bi-tarîkı’l-münâsahati’ş-şer‘iyye otuz altı sehmden i‘tibâr olunup sihâm-ı mezbûrdan on yedi sehmi mezbûr Mehmed Efendi’ye ve sekizer sehmi kızları mezbûretân Âişe ve Fâtıma’dan her birine ve üç sehmi dahi li-ebin kız karındaşı mezbûre diğer Fâtıma’ya isâbet ve intikāl eylediği lede’ş-şer‘i’l-enver sâbit ü zâhir oldukdan sonra mezbûre diğer Fâtıma Hatun ile zevcesi mezbûre Âişe Hatun taraflarından husûs-ı âti’l-beyana vekîl olduğu mezbûretânın zâtlarını ma‘rifet-i şer‘iyye ile mu‘arrefe olan Hüseyin Efendi b. Mustafa ve Mehmed Efendi b. Ahmed nâm kimesneler şehâdetleri ile sâbit olan Mustafa Efendi b. Şaban nâm kimesne mahmiye-i mezbûrede meclis-i şer‘de işbu bâ‘isü’l-kitâb Mahmud Çelebi b. Mehmed Efendi mahzarında bi’l-vekâle ikrâr ve takrîr-i kelâm edip mahâlle-i mezbûrede vâki‘ bir tarafdan Evrezâde? menzili ve bir tarafdan Hasan Efendi veresesi mülkü ve bir tarafdan tarîk-i âm ile mahdûd dâhiliye ve hâriciyesi büyût-ı adîdeyi müştemil olan mülk menzilin hâriciyesi mezbûr Mehmed Efendi’nin mülkü ve dâhiliyesi dahi müteveffât-ı mezbûre Alime Hatun’un ile’l-vefât mülkü olup ba‘de-vefâtihâ veresesi mezbûrûna isâbet ve intikāl etmekle menzil-i mahdûd-ı mezbûrun dâhiliyesinden tashîh-i mezbûr üzere sihâm-ı mezbûreden zevcem müvekkile-i mezbûre Âişe’ye isâbet eden sekiz sehim hissesini yetmiş guruşa müvekkile-i mezbûre diğer Fâtıma’ya isâbet eden üç sehim hissesini dahi yirmi guruşa olmak üzere müvekkiletân-ı mezbûretândan her biri bi-cümleti’t-tevâbi‘ ve’l-levâhık tarafeynden îcâb ve kabûlü hâvî bey‘-i kat‘î ile mezbûr Mahmud Çelebi’ye her biri [bey‘] ve teslîm ol dahi iştirâ ve tesellüm eylediğinden sonra semenleri olan meblağayn-i mezbûreyn ki yetmiş guruş ve yirmi guruş ki cem‘an doksan guruşu mezbûr Mahmud Çelebi yedinden her biri tamâmen ahz u kabz eylediler ba‘de’l-yevm menzil-i mahdûd-ı mezbûrun dâhiliyesinde zevcem müvekkile-i mezbûre Âişe Hatun’un sekiz sehim hissesinde ve mezbûre diğer Fâtıma Hatun’un üç sehim hissesinde alâka ve medhalleri kalmayıp müvekkiletân-ı mezbûretânın menzil-i mahdûd-ı mezbûrun dâhiliyesinde olan on bir sehim hisseleri mezbûr Mahmud Çelebi’nin [37a] mülk-i müşterâsı olmuşdur, keyfe mâ yeşâ ve yahtâr mutasarrıf olsun dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fi’l-yevmi’t-tâsi‘ aşer min-Saferi’l-hayr li-sene sitte aşere ve mi’e ve elf. Şuhûdü’l-hâl: Mehmed Efendi b. İbrahim, Mehmed Efendi b. Musa el-imâm, el-Hâc Osman b. Mustafa, Mehmed Efendi b. Mehmed el-müezzin, el-Hâc Osman b. Mustafa, Hüseyin Efendi b. Mehmed.