Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 179 Hüküm no: 114 Orijinal metin no: [37a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kasap Balaban’ın koyun eti bedelinden Kiro v. Dimo’da olan alacağını tahsil etmesi Havâss-ı refî‘a kazâsı muzâfâtından Terkos nâhiyesine tâbi‘ Avas? nâm karye ahâlîsinden olup kasab tâifesinden Balaban v. Dimo nâm zimmî mahmiye-i İstanbul’da meclis-i şer‘-i hatîrde işbu bâ‘isü’r-rakīm Kiro v. Hıristo nâm zimmî muvâcehesinde bi-tav‘ihî ikrâr ve takrîr-i kelâm edip mesfûr Kiro bundan akdem mahmiye-i mezbûrede Küçük Karaman’da vâki‘ kasab dükkânında kanadârım olup âhara bey‘ için irsâl eylediğim beynimizde vakiyesi ma‘lûm lahm-ı ganem bahasından ba‘de’l-hesâb zimmetinde müctemi‘a olan yirmi sekiz bin iki yüz akçemi mesfûr Kiro bana def‘ ü teslîm ben dahi yedinden tamâmen ahz u kabz eylediğimden sonra hukūk-ı mezbûra ve târîh-i kitâba gelinceye değin beynimizde cârî mu‘âmelâta ve sâir hukūka müte‘allıka âmme-i da‘vâdan mesfûr Kiro’nun zimmetini ibrâ-i âm ile ibrâ ve iskāt eyledim dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fi’l-yevmi’s-sânî aşer min-Saferi’l-hayr li-sene sitte aşere ve mi’e ve elf. Şuhûdü’l-hâl: Fahrü’l-eimme Halil Efendi, Ali Ağa b. Abdülkadir, Hasan Bey b. Osman, İbrahim Beşe b. Ali, Mehmed b. Mehmed, Selim Beşe b. Hasan, Hasan b. Halil, Veli Odabaşı, Hasan Beşe b. İbrahim.