Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 179 Hüküm no: 115 Orijinal metin no: [37a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa b. Hüseyin’in günlük bahasından olan borcunu ödemesi gerektiği Cezâyir-i Bahr-ı Sefid’den cezîre-i Rodos’a tâbi‘ Lindos ahâlîsinden ve mellâh tâifesinden Ağabetut v. Manol nâm zimmî mahmiye-i İstanbul’da meclis-i şer‘de es-Seyyid Mustafa b. el-Hâc Hüseyin nâm kimesne mahzarında üzerine da‘vâ ve takrîr-i kelâm edip bundan akdem mezbûr es-Seyyid Mustafa beher kantarı yirmi ikişer guruşa yedimden iştirâ ve kabz eylediği üç kantar altı vakiye günlük bahasından altmış dokuz guruşun bi-hakkın kantarı tozu için ba‘de’l-ihrâç on bir guruşu aşağı varıldıkdan sonra elli sekiz guruş ve bir guruş hasır bahasından dahi ki cem‘an elli dokuz guruşun otuz bir guruşunu mezbûr es-Seyyid Mustafa bana edâ ve teslîm edip bâkī zimmetinde yirmi sekiz guruş hakkım kalmağla hâlâ meblağ-ı bâkī-i mezbûru merkūm es-Seyyid Mustafa’dan taleb ederim, suâl olunsun dedikde gıbbe’s-suâl mezbûr es-Seyyid Mustafa cevâbında fi’l-vâki‘ müdde‘î-i mezbûra günlük ve hasır bahasından cem‘an elli dokuz guruş deyni olduğunu ikrâr, lâkin meblağ-ı mezbûrun kabzını i‘tirâf eylediği otuz bir guruşdan mâ‘adâ on yedi buçuk guruşunu dahi kendüye edâ ve teslîm edip ancak zimmetinde müdde‘î-i mezbûra on buçuk guruş deynim bâkī kalmışdır deyü meblağ-ı mezbûrun on yedi buçuk guruşunda def‘le mukābele edicek gıbbe’l-istintâk ve’l-inkâr mezbûr es-Seyyid Mustafa’dan def‘-i mezkûruna beyyine taleb olundukda udûl-i ahrâr-ı ricâl-i Müslimînden ve attâr tâifesinden Mehmed b. Mustafa ve Ali b. <> Yusuf nâm kimesneler li-ecli’ş-şehâde meclis-i şer‘e hâzırân olup istişhâd olunduklarında fi’l-vâki‘ müdde‘î-i mezbûrun merkūm es-Seyyid Mustafa’dan meblağ-ı mezbûrdan kabzını i‘tirâf eylediği otuz guruşdan mâ‘adâ on yedi buçuk guruşunu dahi bizim huzûrumuzda merkūm es-Seyyid Mustafa müdde‘î-i mezbûra edâ ve teslîm ol dahi yedinden ahz u kabz eyledi, biz bu husûsa bu vech üzere şâhidleriz şehâdet dahi ederiz deyü her biri edâ-yı şehâdet-i şer‘iyye eylediklerinde gıbbe’t-ta‘dîl ve’t-tezkiye şehâdetleri makbûle olmağın mûcebince ba‘de’l-hükm meblağ-ı bakī-i mezbûr on buçuk guruşu müdde‘î-i merkūma edâ ve teslîme mezbûr es-Seyyid Mustafa’ya tenbîh birle mâ-vaka‘a bi’t-taleb ketb olundu. Fi’l-yevmi’l-hâmis aşer min-Saferi’l-hayr li-sene sitte aşere ve mi’e ve elf. Şuhûdü’l-hâl: Hüseyin Efendi b. Himmet, el-Hâc Mehmed Efendi el-kādı, İsmail Efendi el-kâtib, Mehmed Emin Efendi el-kādı.