Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 200 Hüküm no: 141 Orijinal metin no: [42b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed b. Hasan’ın, vefat eden Yusuf’tan intikal eden ev hissesini Osman b. Abdullah’a satması Vilâyet-i Rumeli’nde Kilis sancağında vâki‘ Akhisar kazâsına tâbi‘ Terzice-i zîr nâm karyede sâkin iken bundan akdem vefât eden Yusuf b. Osman b. Abdullah nâm müteveffânın verâseti li-ebin kız karındaşları Emine ve Meryem ve Hadîce nâm hatunlar ile li-ebin ammisi oğlu Mehmed b. Hasan nâm kimesneye münhasıra olduğu lede’ş-şer‘ zâhir oldukdan sonra mezbûr Mehmed mahmiye-i İstanbul’da meclis-i şer‘-i hatîrde işbu bâ‘isü’l-kitâb Osman b. Abdullah nâm kimesne mahzarında ikrâr ve takrîr-i kelâm edip mûrisim müteveffâ-yı mezbûr Yusuf’un karye-i mezbûrede vâki‘ bir tarafdan Kemâlzâde nâm kimesnenin çiftliği ve bir tarafdan Terzice-i bâlâ nâm karye sınırı ve bir tarafdan nehr-i cârî ve bir tarafdan müşterî-i mezbûr Osman’ın menzili ile mahdûd üç bâb oda ve bir samanlık ve bir anbar ve bir matbâh ve harman yeri ve havluyu müştemil mülk menzilin sülüsân hissesi mezbûrât Emine ve Meryem ve Hadîce’ye isâbet edip ve sülüs hissesi bana isâbet etmekle menzil-i mahdûd-ı mezbûrdan bana isâbet eden sülüs hisse-i şâyi‘amı tarafeynden îcâb ve kabûlü hâvî bey‘-i bâtt-ı sahîh-i şer‘î ile mezbûr Osman’a otuz guruşa bey‘ ve temlîk ol dahi ber-vech-i muharrer iştirâ ve temellük ve kabûl eyledikden sonra semeni olan meblağ-ı mezbûr otuz guruşu yedinden tamâmen ahz u kabz edip ba‘de’l-yevm menzil-i mahdûd-ı mezbûrda olan sülüs hisse-i şâyi‘ada benim alâka ve medhalim kalmayıp mezbûr Osman’ın mülk-i müşterâsı olmuşdur. mahâllinde kabza taslît eyledim, keyfe mâ yeşâ ve yahtâr mutasarrıf olsun dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî 28 min-Saferi’l-hayr sene 1116. Şuhûdü’l-hâl: İsmail Efendi el-kâtib, Ömer Efendi b. Ali Efendi, Abdullah Efendi el-müezzin-i sadr-ı âlî, Ali b. Abdullah Akhisârî, Mühürdâr Hasan Ağa b. ( ), Veliyüddin Efendi el-kādı, el-Hâc Yusuf b. ( ).