Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 201 Hüküm no: 142 Orijinal metin no: [42b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Saliha bt. Mehmed’in terbiyesinde bulunan Hanife’ye annesinden intikal eden paranın vasisi Yakub Beşe’den tahsil edilmesi Mahmiye-i İstanbul’da el-Hâc Muhyiddin mahâllesi sâkinelerinden iken bundan akdem müteveffiye olan Hadîce bt. Mahmud nâm hatunun verâseti vâlidesi Saliha bt. Mehmed nâm hatun ile sagīre kızı Hanife’ye ve babası Mahmud b. ( ) nâm kimesneye münhasıra olduğu müte‘ayyin oldukdan sonra sagīre-i mezbûrenin mürettibesi olan mezbûre Saliha Hatun mahmiye-i mezbûrede meclis-i şer‘de sagīre-i mezbûrenin tesviye-i umûruna kıbel-i şer‘den mansûb vasîsi olan bâ‘isü’l-kitâb Yakub Beşe b. Sinan mahzarında ikrâr ve takrîr-i kelâm edip sagīre-i mezbûreye vâlidesi müteveffât-ı mezbûrenin terekesinden defter-i kassâm nâtık olduğu üzere otuz guruş ile iki rub‘ guruş isâbet etmiş idi. El-hâletü hâzihi târîh-i kitâba gelince sagīre-i mezbûrenin yirmi dört ayda nafaka-i mefrûzası dahi otuz guruş ve iki rub‘ guruşa bâliğ olmağla meblağ-ı mezbûr otuz guruş ve iki rub‘ guruşu vasiyy-i mezbûr yedinden tamâmen ahz u kabz edip müteveffât-ı mezbûreden sagīre-i mezbûreye intikāl eden hissesinden mezbûr Yakub Beşe zimmetinde bir nesne bâkī kalmadı dedikde gıbbe’t-tasdîki’ş-şer‘î bi’t-taleb ketb olundu. Fi’l-yevmi’s-sâmin ve’l-ışrîn min-Saferi’l-hayr li-sene sitte aşere ve mi’e ve elf. Şuhûdü’l-hâl: Abdullah Efendi el-imâm, Ahmed Efendi b. Abdülkadir, Ebubekir Çelebi el-müezzin, Mustafa Çelebi b. Abdullah, el-Hâc Yusuf b. Osman, el-Hâc Ali Çukadâr.