Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 201 Hüküm no: 143 Orijinal metin no: [42b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ölen Yorgaki’nin varisleri arasındaki alacak davasının sulhla sonuçlandığı Mahrûse-i Edirne’de Tahtakale mahâllesinde sâkin iken bundan akdem hâlik olan Yorgaki v. Hıristo nâm zimmînin verâseti vâlidesi Vafna bt. Gorina ve zevce-i metrûkesi Sare bt. Kaplan’a ve sulbiye sagīre kızı Horobsina ve sagīr oğlu Gogoş’a münhasıra olduğu şer‘an zâhir oldukdan sonra zâtını ta‘rîf-i şer‘î ile mu‘arrefe olup kendi tarafından asil ve sagīrân-ı mezbûrân’ın vâlideleri ve tesviye-i emirlerine kıbel-i şer‘den mansûb vasîleri olan mezbûre Sare mahmiye-i İstanbul’da meclis-i şer‘de hâlik-i mezbûrun vâlidesi ve sagīrân-ı mezbûrânın mukaddemâ vasîleri olan işbu ba‘isü’s-sifr mezbûre Vafna muvâcehesinde ikrâr ve takrîr-i kelâm edip zevcem mezbûr Yorgaki hâlik oldukda vâlidesi mezbûre Vafna sagīrân-ı mezbûrânın tesviye-i emrlerine benden mukaddem vasîleri olmağla vesâyetden azl ve yerine ben vasî oldukdan sonra mezbûre Vafna zamân-ı vesâyetinde zevcem hâlik-i mezbûrun muhallefâtından [43a] gāibân ani’l-meclis Halıcı Kılab v. Sava ve şerîki Sava v. Gorgi nâm zimmîler zimmetlerinde olan altmış bin sağ akçeyi mezbûre Vafna’nın ma‘rifetiyle tahsîl ve meblağ-ı mezbûrdan mezbûre Vafna’nın südüs hissesine isâbet eden on bin akçeyi mezbûre Vafna ahz u kabz edip ve mâ‘adâsı olan elli bin sağ akçe benim ile sagīrân-ı mezbûrânın hisseleri için ben ahz u kabz edip bu vech üzere mezbûre Vafna yedinde bir nesne zuhûr etmemekle bu vech üzere zevcim hâlik-i mezbûrun muhallefâtından bana isâbet eden hisseye müte‘allıka âmme-i da‘vâ ve mutâlebâtdan ben mezbûre Vafna’nın zimmetini ibrâ-i âm ile ibrâ ve iskāt eyledim dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fi’l-yevmi’t-tâsi‘ ve’l-ışrîn min-Saferi’l-hayr li-sene sitte aşere ve mi’e ve elf. Şuhûdü’l-hâl: Süleyman Çavuş b. ( ), Mehmed Çelebi b. ( ), Peyker Mehmed Çavuş b. ( ), el-Hâc Yusuf b. ( ) Yani v. Sava, Mako v. Dobniçe, Papas v. Marko.