Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 202 Hüküm no: 144 Orijinal metin no: [43a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali b. Abdullah’ın Nurullah Efendi aleyhindeki emanet davasının reddedilmesi Mahmiye-i İstanbul’da Sultân Mehmed Câmi‘-i şerîfi kurbünde sâkin Ali b. Abdullah nâm kimesne mahmiye-i mezbûrede meclis-i şer‘de müftî-yi sâbık es-Seyyid Feyzullah Efendi’nin oğlu es-Seyyid Ahmed Efendi’nin etbâ‘ından Nurullah Efendi b. Mehmed nâm kimesne mahzarında üzerine da‘vâ ve takrîr-i kelâm edip târîh-i kitâbdan bir sene mukaddem mahrûse-i Edirne’de mezbûr Nurullah Efendi yedine malımdan bir kese içinde memhûr yüz yirmi guruşumu îdâ‘ ve teslîm ol dahi istîdâ‘ ve tesellüm etmekle hâlâ alâ-tarîkı’l-emâne yedine teslîm eylediğim memhûr kese içinde mevcûd yüz yirmi guruşu taleb ederim suâl olunsun dedikde gıbbe’s-suâl mezbûr Nurullah Efendi cevâbında fi’l-hakīka târîh-i mezbûrda mezbûr Ali bir kese içinde memhûr bir mikdâr akçe alâ-tarîkı’l-emâne yedime def‘ ü teslîm ben dahi ahz u kabz edip mezbûr Ahmed Efendi’nin menzilinde sâkin olduğum odamda hıfz üzere iken târîh-i mezbûrda olan ma‘reke esnâsında bir mikdâr eşkıyâ mezbûr Ahmed Efendi’nin menzilini nehb u gāret eylediklerinde sâkin olduğum odamda benim eşyâm ile ma‘an meblağ-ı mezbûr nehb u gāret olunup ol vechile bilâ-ta‘ad zâyi‘ olmuşdur deyip husûs-ı mezbûrda mezbûr Nurullah Efendi emîn olup yedi yed-i emânet olmağla yemîni ile tasdîk olunur makūlesinden olmağın mezbûr Nurullah Efendi meblağ-ı mezbûra ber-vech-i muharrer yedinden bilâ-ta‘ad zâyi‘ olduğuna müdde‘î-i mezbûr talebiyle tahlîf olundukdan sonra mûcebiyle müdde‘î-i mezbûr bî-vech mu‘ârazadan men‘ birle mâ-vaka‘a bi’t-taleb [ketb olundu.] Fi’l-yevmi’s-sâmin ve’l-ışrîn min-Saferi’l-hayr li-sene sitte aşere ve mi’e ve elf. Şuhûdü’l-hâl: el-Hâc Mehmed Efendi, İsmail Efendi, Veliyüddin Efendi, Mehmed Efendi.