Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 203 Hüküm no: 145 Orijinal metin no: [43a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Manisa’da Ali Bey Vakfı eski mütevellisi Hasan Ağa’nın İbrahim Efendi’de olan alacağının tahsili Vilâyet-i Anadolu’da Manisa’da vâki‘ Ali Bey Evkāfı’nın sâbıkā mütevellî vekîli olan Hasan Ağa b. Mehmed nâm kimesne mahmiye-i İstanbul’da meclis-i şer‘-i hatîrde sâbıkā medîne-i mezbûrede nâibü’ş-şer‘ olan bâ‘isü’l-kitâb İbrahim Efendi b. Ali nâm kimesne mahzarında üzerine da‘vâ ve takrîr-i kelâm edip mezbûr İbrahim Efendi bundan akdem medîne-i mezbûrede nâib olmağla bir husûsun temşiyeti için târîh-i kitâbdan bir sene mukaddem bi-tarîkı’r-rüşve mezbûr İbrahim Efendi’ye bir def‘a otuz guruş ve bir def‘a dahi beş guruş ve emriyle ismi ma‘lûmum olmayan bir kimesneye medfû‘um olan guruş ki min-haysü’l-mecmû‘ mezbûr İbrahim Efendi zimmetinde hakkım olan kırk beş guruşu hâlâ mezbûr İbrahim Efendi’den taleb ederim, suâl olunsun dedikde, gıbbe’s-suâl mezbûr İbrahim Efendi cevâbında müdde‘î-i mezbûr Hasan Ağa’dan ancak beş guruş kabzını ikrâr ziyâdeyi inkâr edicek müdde‘î-i mezbûrdan ziyâde müdde‘âsına beyyine taleb olundukda ityân-ı beyyineden izhâr-ı acz ile istihlâf etmeğin fi’l-hakīka kabzını i‘tirâf eylediği beş guruşdan ziyâde müdde‘î-i mezbûrun müdde‘âsı üzere kırk guruşunu dahi ahz u kabz etmeyip üzerine redd ü damândan bir nesne lâzım gelmediğine mezbûr İbrahim Efendi’ye yemîn teklîf olundukda ol dahi hasbe’l-mesûl yemîn billâhi’l-ale’l-a‘lâ etmeğin mûcebince meblağ-ı merkūm beş guruşu müdde‘î-i merkūma edâ ve teslîme mezbûr İbrahim Efendi’ye ba‘de’t-tenbîh müdde‘î-i mezbûr Hasan ziyâde da‘vâsından bilâ-beyyine bî-vech mu‘ârazadan men‘ olunup mâ-vaka‘a bi’t-taleb ketb olundu. Fi’l-yevmi’s-sâmin ve’l-ışrîn min-Saferi’l-hayr li-sene sitte aşere ve mi’e ve elf. Şuhûdü’l-hâl: Mehmed Efendi b. Ahmed, İsmail Efendi b. el-Hâc Siyavuş, Ömer Efendi b. Ali, el-Hâc Yusuf b. Osman.