Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 203 Hüküm no: 146 Orijinal metin no: [43b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat Eden Canbaz Ahmed Beşe’nin Veli Beşe’de olan alacağının varislerinin vekili Mehmed’e teslimi Fi’l-asl vilâyet-i Rumeli’de medîne-i Kalkandelen mahâllâtından Ahmed Bey mahâllesi ahâlîsinden olup mahmiye-i İstanbul’da Etpazarı’nda mutavattın ve Dergâh-ı âlî yeniçerilerinin Otuzüç Ağa Bölüğü camcılarının odasına mahsûs oda neferâtından iken bundan akdem fevt olan Canbaz Ahmed Beşe b. Ali b. Ahmed’in verâseti zevce-i metrûkesi Afife bt. Mehmed b. Mehmed nâm hatun ile sulbî sagīr oğulları Ali ve İbrahim ve vâlidesi Hadîce bt. Ahmed b. Ali nâm hatuna münhasıra olduğu nakl-i şer‘î ile sâbit ve zâhir oldukdan sonra sagīrân-ı mezbûrânın kıbel-i şer‘den mansûb vasîleri ve vâlideleri mezbûre Afife ve mezbûre Hadîce taraflarından husûs-ı âti’l-beyana vekîl olduğu zeyl-i nakilde isimleri mastûr şuhûddan İsmail b. Mustafa ve el-Hâc Ramazan b. Mustafa nâm kimesneler şehâdetleri ile sâbit olan Mehmed b. Mehmed nâm kimesne mahmiye-i mezbûrede meclis-i şer‘de müteveffâ-yı mezbûrun terekesini kabz ve veresesine îsâle vasiyy-i muhtârı olan işbu bâ‘isü’l-vesîka Veli Beşe b. Ali nâm kimesne mahzarında bi’l-vekâle ikrâr ve takrîr-i kelâm edip müteveffâ-yı mezbûr hayâtında terekesini kabza ve veresesine îsâle mezbûr Veli Beşe’yi vasiyy-i muhtâr nasb u ihtiyâr etmekle ol dahi ba‘de’l-kabûl müteveffâ-yı mezbûr fevt oldukda ber-mûceb-i defter terekesini kabz eylediğinden sonra verese-i mezkûrûn medîne-i mezbûrede olmağla ber-vech-i muharrer verâsetlerini ve taraflarından kendülere isâbet eden hisselerini terekesine vâzı‘ü’l-yed olanlardan taleb ve da‘vâ ve ahz u kabza ve kendülere îsâle bi’l-asâle ve bi’l-vesâye beni vekîl eylediklerini huzûr-ı hâkim-i muvakkı‘-ı kitâbda yedimde olan nakl-i şer‘î ile isbât ve ba‘de’l-hükm yedime işbu vürûd-ı nakli vermişdi. El-hâletü hâzihi merkūm Veli Beşe ber-mûceb-i defter müteveffâ-yı mezbûrun terekesinden makbûzu olan yüz guruşu bana bi’l-vekâle def‘ ü teslîm ben dahi yedinden ahz u kabz eylediğimden sonra tereke-i müteveffâ-yı mezbûrdan merkūm Veli Beşe yedinde bâkī bir akçe kalmamışdır dedikde, gıbbe’t-tasdîki’ş-şer‘î mâ-vaka‘a bi’t-taleb ketb olundu. Fi’l-yevmi’t-tâsi‘ ve’l-ışrîn min-Saferi’l-hayr sene sitte aşere ve mi’e ve elf. Şuhûdü’l-hâl: Hüseyin Ağa, Kara Mustafa Beşe, Mahmud Beşe, Mustafa Beşe, İvaz Beşe.