Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 204 Hüküm no: 147 Orijinal metin no: [43b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Mustafa Ağa’nın varisleri Mehmed ve Rabia’nın vekaletten dolayı Hasan Paşa’da olan alacaklarının tahsili Bâ-imzâ-i hazret-i veliyyü’n-ni‘me Mahmiye-i İstanbul’da Horhor Çeşmesi kurbünde İsmail Ağa mahâllesinde sâkin iken bundan akdem fevt olan Mustafa Ağa b. Hasan’ın verâseti li-ebin er karındaşı es-Seyyid Mehmed ile li-ebin kız karındaşı Şerîfe Rabia’ya münhasıra olduğu lede’ş-şer‘ zâhir ve mütehakkık oldukdan sonra nefsinden asil ve kız karındaşı mezbûre Rabia’nın husûs-ı âti’l-beyana vekîl-i şer‘îsi mezbûr es-Seyyid Mehmed mahmiye-i mezbûrede meclis-i şer‘de sâbıkā Bosna vâlisi olan umdetü’l-ümerâi’l-kirâm Hasan Paşa b. ( ) mahzarında bi’l-asâle ve bi’l-vekâle üzerine da‘vâ ve takrîr-i kelâm edip babamız müteveffâ-yı mezbûr Mustafa Ağa’nın Basra vâlisi iken bundan akdem fevt olan Osman Paşazâde Ahmed Paşa’da cihet-i karz-ı şer‘îden yedi bin beş yüz guruş hakkı olup meblağ-ı mezbûre işbu müşârün-ileyh Hasan Paşa ile gāibân ani’l-meclis Ali Ağa ve Acem Ramazan Ağa nâm kimesneler emr u kabûlü hâviye kefâlet-i şer‘iyye ile ma‘an kefil olduklarından sonra meblağ-ı merkūmu kable’l-ahz ve’l-istifâ babam mezbûr Mustafa Ağa ile müşârün-ileyh Ahmed Paşa müte‘âkiben fevt olup meblağ-ı merkūm ırsen bana ve kız karındaşım müvekkilem mezbûre Şerîfe Rabia’ya isâbet ve intikāl etmekle hâlâ meblağ-ı mezbûrdan hissesine isâbet eden mikdârı kefâletine binâen müşârün-ileyh Hasan Paşa’dan taleb eylediğimde edâdan imtinâ‘ eder suâl olunsun dedikde, gıbbe’s-suâl müşârün-ileyh Hasan Paşa cevâbında fi’l-vâki‘ meblağ-ı merkūm yedi bin beş yüz guruşa gāibân-ı mezbûrân Ali Ağa ve Acem Ramazan Ağa ile ma‘an emir ve kabûlü hâviye kefâlet-i sahîha-i şer‘iyye ile kefil olduğunu ikrâr u i‘tirâf etmeğin mûcebince meblağ-ı yedi bin beşyüz guruşdan kefâletine binâen hissesine isâbet eden mikdârı mezbûr es-Seyyid Mehmed’e edâ ve teslîme müşârün-ileyh Hasan Paşa’ya tenbîh olunup mâ-vaka‘a bi’t-taleb ketb olundu. fi’l-yevmi’l-ışrîn min-Saferi’l-hayr li-sene sitte aşere ve mi’e ve elf. Şuhûdü’l-hâl: İsmail Efendi el-kâtib, Mehmed Efendi b. Ahmed, Ali Efendi b. Abdurrahman, Mustafa Efendi b. Ali Efendi, el-Hâc Ali Efendi b. Ahmed, Hüseyin Efendi b. Himmet, el-Hâc Yusuf, Mehmed Efendi el-kâtib, Veliyüddin Efendi el-kādı.