Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 205 Hüküm no: 148 Orijinal metin no: [44a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hatice bt. Mehmed’in eşi Abdullah’tan muhalaa usulüyle boşanması Mahmiye-i İstanbul’da Ali Paşa’yı Atik mahâllesinde sâkine Hadîce bt. Mehmed nâm hatun zâtı ba‘de’t-ta‘rîfi’ş-şer‘î mahmiye-i mezbûrede meclis-i şer‘de zevc-i muhâlı‘ı işbu râfi‘ü’l-vesîka Abdullah b. el-Hâc Mustafa nâm kimesne mahzarında ikrâr ve takrîr-i kelâm edip mezbûr Abdullah zevcim olup beynimizde hüsn-i zindegânemiz olmamağla zimmetinde mütekarrir ve ma‘kūdün-aleyh olan altı bin akçe mehr-i müeccelim ve nafaka-i iddet-i ma‘lûmem üzerlerine ve meûnet-i süknâm dahi kendi üzerime olmak üzere zevcim mezbûr Abdullah ile muhâla‘a-i sahîha-i şer‘iyye ile muhâla‘a olduğumda ol dahi hul‘-ı mezbûru ba‘de’l-kabûl hukūk-ı zevciyete müte‘allıka âmme-i da‘vâdan her birimiz âharın zimmetini ibrâ ve iskāt eyledik dedikde gıbbe’t-tasdîki’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’l-isneyn min-şehri Rebî‘i’l-evvel sene sitte aşere ve mi’e ve elf. Şuhûdü’l-hâl: Türbedâr Molla Hasan ( ), Türbedâr Molla Mustafa b. ( ), Molla Mehmed Beşe b. Ahmed, Mehmed Çelebi Edirneli, Molla Musa b. ( ), Şaban Beşe b. Abdullah, Kemâl b. Mehmed.