Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 205 Hüküm no: 149 Orijinal metin no: [44a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Beşe ve Ömer Beşe’nin Naime bt. Hüseyin aleyhindeki miras davasında anlaşma sağlanması Vilâyet-i Rumeli’nde Yenice-i Karasu kazâsına tâbi‘ İsketiye nâm karyede sâkin iken bundan akdem vefât eden Ahmed Ağa b. Mehmed’in verâseti zevce-i menkûha-i metrûkesi Nâime bt. Hüseyin nâm hatun ile sulbî sagīr oğlu İbrahim’e münhasıra olup ba‘dehû mezbûr İbrahim dahi [fevt olup] verâseti vâlidesi mezbûre Nâime Hatun ile li-ümmin karındaşı Mustafa ve li-ebin ammileri Mustafa Beşe ve Ömer Beşe’ye münhasıra olup ve tashîh-i meseleleri alâ-tarîkı’l-münâsahati’ş-şer‘iyye doksan altı sehmden i‘tibâr olunup sihâm-ı mezbûreden kırk sehmi mezbûre Nâime’ye ve on dört sehmi mezbûr Mustafa’ya ve yirmi bir sehmi mezbûrân Mustafa Beşe ve Ömer Beşe’den her birine isâbet eylediği şer‘an zâhir ve müte‘ayyin oldukdan sonra mezbûrân Mustafa Beşe ve Ömer Beşe mahmiye-i İstanbul’da meclis-i şer‘-i şerîf-i enverde tereke-i müteveffâ-yı mezbûra vâzı‘atü’l-yed olan işbu bâ‘isetü’l-kitâb mezbûre Nâime Hatun mahzarında her biri [ikrâr] ve takrîr-i kelâm edip karındaşımız müteveffâ-yı mezbûr Ahmed Ağa’nın ile’l-vefât terekesinden olup zikr olunan İsketiye dere suyuyla dâir bir kıt‘a mülk samakov ile karye-i mezbûrede vâki‘ ma‘lûmü’l-hudûd bir kıt‘a mülk çiftliğe mezbûre Nâime Hatun müstakilleten kendi mülkü olmak üzere bi-gayrı hakkın zabt ve tasarruf eder deyü zikr olunan Samako ile çiftlikden tashîh-i mezkûr üzere bize isâbet eden yirmi birer sehim hissemizi mezbûre Nâime Hatun’dan da‘vâ eylediğimizde ol dahi cevâbında zevcim müteveffâ-yı mezbûr zimmetinde yirmi bin akçe mehr-i müeccelim cihet-i deyn-i şer‘îden dahi otuz altı bin akçe ki cem‘an elli altı bin akçe hakkım olup meblağ-ı mezbûru merkūm Ahmed Ağa bana kable’l-edâ vefât etmekle ba‘de-vefâtihî meblağ-ı mezbûru oğlu sagīr-i mezbûr İbrahim’in vasîsi olan Mehmed Ağa muvâcehesinde târîh-i kitâbdan oniki sene mukaddem huzûr-ı hâkimü’ş-şer‘de da‘vâ ve müdde‘âmı şuhûd-ı udûl ile isbât ve ba‘de’l-half meblağ-ı mezbûr elli altı bin akçeyi terekesinden bana edâya tenbîh olundukdan sonra zikr olunan samakov kırk bin akçeye ve altı bin akçelik mezrû‘âtı hâkimü’ş-şer‘le vasiyy-i mezbûr bana def‘ ü teslîm, ben dahi mecmû‘unu müteveffâ-yı mezbûr Ahmed Ağa’nın zimmetinde hakkım olan meblağ-ı mezbûr elli altı bin akçe mukābelesinde ahz u kabz etmiş idim deyü bir kıt‘a hüccet-i şer‘iyye ibrâz etmekle biz dahi mazmûn-ı hüccet-i mezbûreyi bi’l-külliye inkâr edip ol dahi isbât sadedinde iken beynimize muslihûn tavassut edip da‘vâ-i mezbûremizden mahâllinde kabz etmek üzere tereke-i müteveffâ-yı mezbûrdan olup mârrü’z-zikr İsketiye nâm karyede vâki‘ bir tarafdan Odabaşızâde mülkü ve iki tarafdan bizim âhar mülkümüz ve bir tarafdan tarîk-i âm ile mahdûd ve mümtâz üç bâb fevkānî oda ve bir sofa ve bir fırın ve havluyu müştemil menzil üzerine sulh eylediklerinde biz dahi sulh-ı mezbûru kabûl ve bedel-i olan menzil-i mezbûru mahâllinde zabta bizi taslît eyledikden sonra mârrü’z-zikr samakov ve çiftlik-i mezbûra ve sâir müteveffâ-yı mezbûrun kalîl u kesîr, celîl ü hakīr ismi mâl ıtlâk olunur eşyâsına müte‘allıka âmme-i de‘âvî ve kâffe-i mutâlebâtdan biz mezbûre Nâime Hatun’un zimmetini ibrâ-i âmm-ı kātı‘ü’n-nizâ‘la ibrâ ve iskāt edip ve mezbûre Nâime Hatun dahi bizim zimmetimizi ibrâ ve iskāt eyledi dedikde, gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî-gurreti şehr-i Rebî‘i’l-evvel li-sene sitte aşere ve mi’e ve elf. Şuhûdü’l-hâl: Mustafa Beşe b. Abdullah, Mehmed Beşe b. Ali, Mustafa Çelebi b. Süleyman, Abdurrahman b. Ahmed, Bayram b. Ali, Mustafa Efendi el-kâtib, Veli Efendi el-kādı, el-Hâc Yusuf b. Osman.