Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 207 Hüküm no: 150 Orijinal metin no: [44b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rabia Hatun’un menzil ve su hissesini İbrahim b. Abdülkerim’e satması Mahmiye-i İstanbul’da İbrahim Paşa-i atik mahâllesinde sâkine olup zâtı ta‘rîf-i şer‘î ile mu‘arrefe olan Rabia bt. Mehmed Efendi nâm hatun mahmiye-i mezbûrede meclis-i şer‘-i hatîr-i lâzımü’t-tevkīrde işbu bâ‘isü’l-kitâb el-Hâc İbrahim b. Abdülkerim nâm kimesne mahzarında ikrâr ve takrîr-i kelâm edip mahâlle-i mezbûrede vâki‘ hudûdu beynimizde ma‘lûm Çadırcı Hayreddin Vakfı’ndan olup [nısfı] benim ve nısf-ı âharı zevcim Mehmed b. Ahmed nâm kimesnenin tasarrufunda olan dâhiliye ve hâriciye büyût-ı adîde ve kârgîr mahzen ve kuyuyu müştemil vakıf menzilimizi zevcim mezbûr Mehmed ile ben izn-i mütevellî ile bundan akdem iki bin sekiz yüz altmış guruş bedel mukābelesinde mezbûr el-Hâc İbrahim’e ferâğ ve tefvîz ol dahi tefevvüz ve kabûl eyledikden sonra menzil-i mezbûrda benim mülküm olup kanevât-ı müsennât ile muharrere bir çuvaldız mâ-i cârîyi mezbûr el-Hâc İbrahim’e ben bey‘ etmeyip yedimde kalmağın hâlâ zikr olunan suyu dahi mezbûr el-Hâc İbrahim’e yüz yetmiş guruşa bey‘ ol dahi iştirâ ve tesellüm ve kabûl edip semeni olan meblağ-ı mezbûr yüz yetmiş guruşun yetmiş guruşunu beynimizde ma‘lûm menzil ücretinden mezbûr el-Hâc İbrahim’e deynim olan yetmiş guruşa takās, ol dahi mukāssa ve kabûl ve yüz guruşunu dahi mezbûr el-Hâc İbrahim yedinden nakid alıp kabz edip bu vech üzere meblağ-ı mezbûr yüz yetmiş guruşu mezbûr el-Hâc İbrahim yedinden tamâmen ahz u istîfâ eyledim ba‘de’l-yevm zikr olunan suda ve menzil-i mezbûrda alâka ve medhalim kalmadı. Husûs-ı mezbûra müte‘allıka âmme-i da‘vâdan ben mezbûr el-Hâc ibrâhim’in zimmetini ibrâ-i âm ile ibrâ ve iskāt edip ol dahi ber-vech-i muharrer benim zimmetimi ibrâ ve iskāt eyledi dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fi’l-yevmi’t-tâsi‘ ve’l-ışrîn min-Saferi’l-hayr li-sene sitte aşere ve mi’e ve elf. Şuhûdü’l-hâl: Hacı Osman b. Hacı Mehmed, Hacı Mehmed b. İbrahim, Mustafa Çelebi b. Ali, Hacı Mehmed Usta b. ( ). Yusuf Çavuş mübâşir, Ahmed Bey b. Ahmed, Yusuf b. Abdullah.