Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 207 Hüküm no: 151 Orijinal metin no: [44b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan Ağa’nın tımarı dahilindeki ahaliden fazla vergi almayacağına ve reayayı kanuna aykırı çalıştırmayacağına dair taahhüt vermesi Vilâyet-i Rumeli’nde Göllükesri kazâsı ahâlîsinden olup kazâ-i mezbûra tâbi‘ Zaciste nâm karyeye ber-vech-i tımâr mutasarrıf olan Hasan Ağa b. Ahmed nâm kimesne mahmiye-i İstanbul’da meclis-i şer‘-i hatîrde karye-i mezbûre re‘âyâlarından bâ‘iseyi’s-sifr Velisar v. Kiro ve Nikola v. Yani nâm zimmîler muvâcehelerinde ikrâr ve takrîr-i kelâm edip mezbûrân zimmîler kendileri asâleten ve sâir karye-i mezbûre re‘âyâları taraflarından vekâleten kānûn ve defterde tahrîr olunan ispençe ve sâir rüsûmâtımızı biz ber-mûceb-i defter vermeğe râzılar iken bi-gayrı hakkın ziyâde ahz eylediğinden mâ‘adâ bize beher sene orak biçdirip ve çift sürdürüp cevr ü eziyet eder deyü bundan akdem da‘vâ sadedinde olmuşlar idi. El-hâletü hâzihi fîmâ-ba‘d ben mezbûrân zimmîlerin ve sâir karye-i mezbûre re‘âyâlarının lâzım gelen a‘şâr-ı şer‘iyye ve rüsûm-ı örfiyelerini kānûn ve defter mûcebince alıp ziyâde talebiyle ve sâir bahâne ile bir dürlü cevr ü eziyet etmeyip hilâf-ı şer‘ ve hilâf-ı kānûn merkūmûna hizmet dahi teklîf etmemeğe ta‘ahhüd eyledim dedikde, gıbbe’t-tasdîki’ş-şer‘î mâ-vaka‘a bi’t-taleb ketb olundu. Fi’l-yevmi’s-sânî min-şehri Rebî‘i’l-evvel sene sitte aşere ve mi’e ve elf. Şuhûdü’l-hâl: Mehmed Efendi b. Ahmed, İsmail Efendi el-kâtib, Ömer Efendi b. Ali, el-Hâc Yusuf b. Osman.