Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 210 Hüküm no: 153 Orijinal metin no: [45a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Halil b. Hüseyin’in gasp davasını ispat edememesi Mahmiye-i İstanbul’da Küçük Karaman kurbünde vâki‘ handa müsâfiren sâkin Halil b. Hüseyin nâm kimesne mahmiye-i mezbûrede meclis-i şer‘-i enverde bâ‘iseyi’l-vesîka Ali b. Mustafa ve İbrahim [b.] Mustafa nâm kimesneler mahzarlarında üzerlerine da‘vâ ve takrîr-i kelâm edip târîh-i kitâbdan on gün mukaddem Edirne’den gelir iken Büyükçekmece kurbünde mezbûrân Ali ve İbrahim üzerime hücûm, bi-gayrı hakkın kırk buçuk guruş ile beş guruş kıymetli bir tüfengimi ahz u kabz eylediler, suâl olunup alıverilmesi matlûbumdur dedikde gıbbe’s-suâl ve akībe’l-inkâr müdde‘î-i mezbûrdan vech-i meşrûh üzere müdde‘âsını mübeyyine beyyine taleb olundukda ityân-ı beyyineden izhâr-ı acz edip istihlâf etmeğin fi’l-hakīka müdde‘î-i mezbûr Halil’in üzerine hücûm edip kırk dört buçuk guruşuyla bir tüfengini ahz u kabz etmediklerine mezbûrân Ali ve İbrahim’den her birine yemîn teklîf olundukda onlar dahi alâ-vefkı’l-mesûl yemîn billâhi’l-aliyyi’l-a‘lâ etmeğin mûcebince bî-vech mu‘ârazadan men‘ birle mâ-vaka‘a bi’t-taleb ketb ü imlâ olundu. Fi’l-yevmi’s-sânî min-şehri Rebî‘i’l-evvel li-sene sitte aşere ve mi’e ve elf. Şuhûdü’l-hâl: Ahmed Bey b. Süleyman, Veli Çelebi b. Ahmed, Ahmed Çelebi b. Şaban, Mustafa Çelebi b. Ahmed, el-Hâc Ali b. Ahmed, Mustafa Bey b. Süleyman, el-Hâc Ahmed b. Mehmed, el-Hâc Yusuf.